ಆಹ್ವಾನ

ಮಾಘಿಯ ಚಳಿಗೆ
ನೀ ಬತ್ತಿ ನಿಡುಸುಯ್ದು
ನಿನ್ನಂಗಂಗಾವನೆಲ್ಲ
ಬರಿದಾಗಿಸಿದ್ದು ಸಾಕು.

ಚಿಗುರು ಚಿಗುರೆಲೆ ಮರವೆ
ಹಸಿರ ಮೆದ್ದೆಯ ಹೊದ್ದು
ಇಳೆ ಆಕಾಶದೌತಣಕೆ
ಶೃಂಗಾರಗೊಳ್ಳಲಿ.

ಬಾಗಿ ಬಳುಕುವ ಟೊಂಗೆ
ಗಾಳಿ ಗಂಧದಿ ಬೆರೆತು
ನಿಡುಸುಯ್ವ ಸೊಗಸು
ಚಿಗುರ ನವೋಲ್ಲಾಸ.

ನಿನ್ನಂಗಳದ ತುಂಬಾ
ನವಿರ ಕಂಪನು ಸೂಸಿ
ಬಿರಿದ ಮೊಗ್ಗು ಮಲ್ಲೆ
ನೆಚ್ಚಿ ತೊನೆದಾಡಲಿ.

ಬೆಳೆದ ಪಚ್ಚೆ ಪೈರು
ಸೋಂಪಾಗಿ ನಳನಳಿಸಲು
ನೀನಾಗ ಜಗಕೆ ಕಾಣುವೆ
ಅಂದದ ಶೋಡಷ ಕನ್ಯೆ.

26-3-2019. 9.19pm

ವಸಂತದ ವಯ್ಯಾರಿ

ಆ ಬಾನಿನ ಸಮುಚ್ಚಯದಲಿ
ಗಿರಿ ಶಿಖರಗಳು ಹಸಿರುಟ್ಟು
ತಂಗಾಳಿಯ ಸ್ಪರ್ಶಕೆ
ತೊನೆದಾಡುತಿವೆ ನೋಡಾ!!

ಭೂರಮೆಯ ಒಡಲೆಲ್ಲ
ಮಧುರತೆಯ ಸೊಗಡಿನಲಿ
ಹಿಮಮಣಿಯ ಸಾಂಗತ್ಯಕೆ
ಹಪಹಪಿಸುತಿವೆ ನೋಡಾ॥

ಆ ಭಾಸ್ಕರನ ಕಿರಣ
ಮೈ ಸೋಕಲು ಇಳೆ
ವೈಯ್ಯಾರದಿ ಬಳುಕುತ
ನಾಚಿ ನೀರಾದ ಪರಿ ನೋಡಾ॥

ಇನಿತು ಅವಸರದಲಿ
ಅವ ಬಾಗಿ ಮುತ್ತಿಕ್ಕಲು
ಝಲ್ಲನರಳಿದ ಕೆಂದಾವರೆಯೊಂದು
ಶುಭಾಶಯ ಹೇಳುತಿದೆ ನೋಡಾ॥

ಮುಗುದೆಯವಳು
ವರುಷಕೂ ಬರುವವನ
ಹೊಸದೊಂದು ಹೆಸರಿನಲಿ
ಕರೆದಾಲಿಂಗಿಸುವುದ ನೋಡಾ॥

ನಿಷ್ಕಲ್ಮಶ ಮನಸವಳದು
ತರಿದು ಅಟ್ಟಲಾರಳು
ಎಲ್ಲರೂ ತನ್ನವರೆಂದು
ತಬ್ಬಿ ಹಾರೈಸುವಳು ನೋಡಾ॥

26-3-2019. 3.09pm

ಆಶಯ

ಬಿತ್ತಬೇಕು ಅಲ್ಲಲ್ಲಿ
ಗಟ್ಟಿ ಬೀಜಗಳ
ಧಿಗ್ಗನೆದ್ದು ಮೊಳಕೆಯೊಡಯಬೇಕು
ಯಾರ ಹಂಗಿಲ್ಲದೆ.

ಉತ್ತು ಬಿತ್ತಿ ಬೆಳೆದು
ಹೈರಾಣಾದ ಜೀವಕೆ
ಒಂದಷ್ಟು ಬೆಂಬಲ ಬೆಲೆ ಬರಬೇಕು
ಸಮಾಧಾನಕೆ.

ಮತ್ತೊಂದು ಸಂಧಾನ
ಹೊಲದ ಮಗು
ಮಾತಾಡುತ್ತಾ ಹೂಡಬೇಕು ನೇಗಿಲ
ಭೇಷರತ್ತಾಗಿ.

ಕೊಟ್ಟು ಕೊಳ್ಳುವ
ಅನಿಷ್ಟಗಳ ಸಾರಾಸಗಟಾಗಿ ತರಿದು
ಸಿಗಿದು ತೋರಣ ಕಟ್ಟಬೇಕು
ಮುಲಾಜಿಲ್ಲದೆ.

ದರ್ಪಣದ ಮುಖ
ಅರಳಿ ನಳನಳಿಸಬೇಕು
ಹೈರಾಣಾದ ಜೀವ ಉಳಿಸಬೇಕು
ನೇಣ ಕುಣಿಕೆಯಿಂದ.

ಉತ್ತು ಬಿತ್ತಿ ಬೆಳೆವ
ಬಂಗಾರದ ಭೂಮಿಯ ಒಡೆಯ
ಅನ್ನ ಕೊಡುವ ನಮ ರೈತ
ಈ ದೇಶದ ಆಸ್ತಿ.

4-6-2019. 10.19am

ಮತ್ಯಾಕೆ ಬಿದ್ದಲ್ಲೇ ಸುರಿತಿರುವೆ..?

ಓ…ವರುಣಾ ನಿನ್ನಾರ್ಭಟಕೆ
ಮತ್ತೆ ತತ್ತರಿಸುತಿದೆ ಜನಜೀವನ
ಒಮ್ಮೆ ಶಾಂತವಾಗಿ ಯೋಚಿಸು
ನಿನ್ನ ಕರೆವಲ್ಲಿಗೆ ಹೋಗು ಮಾರಾಯಾ
ಜನ ನಿನ್ನ ದಾರಿ ಕಾಯುತಿಹರು
ಬಿದ್ದಲ್ಲೇ ಬಿದ್ದು ಜನರಿಂದ
ಹಿಡಿ ಶಾಪ ಹಾಕಿಸಿಕೊಳ್ಳಬೇಡಾ
ಇದು ನಾ ನಿನಗೆ ಹೇಳುವ
ಕಿವಿ ಮಾತು!

ಅಗೋ ಅಲ್ಲಿ ನೋಡು
ನೆಲ ಒಣಗಿ ಬಾಯ್ಬಿಟ್ಟಿದೆ
ಕುಡತೆ ನೀರು ಸಿಗದೇ ಕಂಗಲಾಗಿವೆ
ಹೊಲ ಗದ್ದೆಗಳು ಹೈರಾಣಾಗಿ
ಅಲ್ಲಿ ಹೋದರೆ ನಿನಗೆ
ಬಹುತ್ ಮರ್ಯಾದೆಯುಂಟು
ಧೂಪ ದೀಪ ಕರ್ಪೂರದಾರತಿ ಬೆಳಗಿ
ಉಡಿಗೆ ಬಾಗಿನವನ್ನೂ
ನಿಡ್ಯಾರು!

ಬಂದರೂ ಕಷ್ಟ
ಬಾರದಿದ್ದರೂ ಕಷ್ಟ ನೀನು
ಆಕಾಶಕ್ಕೆ ತೂತು ಹೊಡೆದಂತೆ
ಬಿದ್ದಲ್ಲೇ ಬಿದ್ದು ಎದ್ದು ಹೋದವನು
ಮತ್ಯಾಕೆ ಈಪಾಟಿ ಬರುತಿರುವೆ
ಜನರ ಪೂಜೆ ಪುನಸ್ಕಾರಗಳು
ಜಾಸ್ತಿ ಆಯಿತೇ!

ನಂಗೊಂದು ಡೌಟು
ಬೀದಿ ಬೀದಿಗಳಲಿ ಕಾರು ‘ಬಾರು’
ಜೋರು ಜೋರು
ಕೆಂಗಣ್ಣು ಬಿಟ್ಟು ಈರ್ಶೆಯಲಿ
ತೋರುತಿರುವೆಯಾ ನಿನ್ನವತಾರ
ನಂಗಿಲ್ಲದ್ದು ಇವರಿಗ್ಯಾಕೆ ಬಿಡಲಿ
ಎಲ್ಲಾ ನುಂಗಿ ನೀರು ಕುಡಿಸೋಣ
ಇವರದ್ದೆಂತಾ ದೌಲತ್ತು!

ಅಥವಾ…..
ಚೊಕ್ಕ ಮಾಡೋಣವೆಂಬ
ಸ್ವಚ್ಛ ಭಾರತ ಅಭಿಯಾನವೋ ಹೇಗೆ?

20-10-2019. 11.23pm

ಮೊದಲ ಮಳೆ…

ಮೊದಲ ಮಳೆಯ ಆಗಮನಕೆ
ಮನಸ್ಸು ಕೊಂಚ ತಲ್ಲಣ
ಒಂದಷ್ಟು ಖುಷಿ
ಮಗದೊಂದಷ್ಟು ಗಡಿಬಿಡಿ
ಬಢಾರ್ ಬಾಗಿಲು ಬಡಿದ ಸೌಂಡ್
“ಅಯ್ಯೋ!ದೇವರೆ ಎಂತಾತು?”

ಬಡಕ್ಕನೆ ಎದ್ದು ಹೋಗೊ ಅವಸರದಲ್ಲಿ
ತಡವರಿಸಿದ ಬೆಕ್ಕು
ಮ್ಯಾವ್ ಅಂದಾಗ
ಪಾಪ! ಎಂದ್ಯಾರಿಗೆ ಹೇಳಲಿ
ಬೆಕ್ಕಿಗಾ ಬಾಗಿಲಿಗಾ?

ಚಿಲಕ ಜಡಿದ ಮನಸ್ಸು ಕಿಸಕ್ಕೆಂದಾಗ
ಓಹೋ,ಇದಕಿನ್ನೂ ಭಯಂಕರ ಸಂತೋಷ
“ಸೆಖೆಗೆ ಹೈರಾಣಾಗಿ ಸಾಕಾತನ”
ಮೌನ ಮಾತಾಡುತ್ತದೆ
ತೆರೆದ ಬಾಗಿಲು ತನ್ನಷ್ಟಕ್ಕೇ ಮುಚ್ಚಿ
ಮೆಟ್ಟಲೇರುವ ಧಾವಂತ ತಪ್ಪಿದ್ದಕ್ಕೆ
ಖುಷಿ ಪಡುತ್ತದೆ.

ಇತ್ತೀಚೆಗೆ ಹಾಗೆ
ಉತ್ಸಾಹ ಮುಗಿಲೆತ್ತರ
ಶಕ್ತಿ ಕುಂದಿ ದೇಹ ವಲ್ಲೆ ಅಂದಾಗೆಲ್ಲ
ಮನಸ್ಸೆಲ್ಲ ಮ್ಲಾನ
ಒಂದಷ್ಟು ಹುಡುಕಾಟ
ಈ ಮೊದಲ ಮಳೆಯಂತೆ ;

“ಎಷ್ಟು ಧೂಳು,ಕಸ,ಕಡ್ಡಿ ಮನೆಯೊಳಗೆ ತಂದಾಕ್ಲಿ”
ಕಾದು ಕೂತಂತೆ ದಿಢೀರ್ ಬರುವ ಮಳೆ

ಹಾಗೆ ದಿಢೀರ್ ಅಂತ ಬಂದುಬಿಡಬೇಕಪ್ಪಾ ಶಕ್ತಿ
ಅಣಿಯಾಗಿ ಬಿಡುತ್ತದೆ ಚಿತ್ತ
ಒಂದಿನ ಬಿಡದೇ ಯೋಗ,ವಾಕಿಂಗ್, ಡಯಟ್ಟು…..
ಮಣ್ಣೂ ಮಸಿ…ತೀರ್ಮಾನ.

ಥೋ^^^ಎಲ್ಲಾ ಡಬ್ಬಾಕಿ
ಪೊಗದಸ್ತಾಗಿ ಗೊರಕೆ ಹೊಡೆಸುತ್ತದೆ
ಈ ಮೊದಲ ಮಳೆಯ ತಂಪು!

ಮಳೆ ಬಲೂ ಹುಷಾರು
ತನ್ನ ಬೇಳೆ ಬೇಯಿಸಿ ಪರಾರಿ
ಆದರೆ ನನ್ನ ತೀರ್ಮಾನ ಎಕ್ಕುಟ್ಟೋಯ್ತಲ್ಲಾ
ಅಂಡು ಸುಟ್ಟ ಬೆಕ್ಕಿನಂತೆ ವಿಲ ವಿಲ
ಸೆಟಗೊಂಡ ಮನ ಬರಲಿ ಮತ್ತೆ
ಗುರಾಯಿಸುತ್ತದೆ ದೊಣ್ಣೆ ಹಿಡಿದು.

ಬೆಳಗ್ಗೆ ಎದ್ದು ನೋಡಿದರೆ
ಒಂದಾ ಎರಡಾ ಥೋ^^^^^^
ಸೊಂಟಕ್ಕೆ ಸಿಕ್ಕಿಸಿದ ಸೆರಗು
ಗಂಟಾಕಿದ ಮುಡಿ
ಬಿಚ್ಚೋಕೂ ಟೈಮಿಲ್ಲ
ಮನೆಯೆಲ್ಲ ಧೂಳೋ ಧೂಳು
ಛೆ^^^^^ ಹಬ್ಬದ ಕ್ಲೀನೆಲ್ಲಾ ಎಕ್ಕುಟ್ಟೋಯ್ತಲ್ಲಾ
ಕಣ್ಣು ಕೆಂಪಾಗಿ
ಅಳೊದೊಂದು ಬಾಕಿ.

ಆದರೂ ಈ ಮೊದಲ ಮಳೆಯಲ್ಲಿ
ಒಂಥರಾ ಹಿತವಿತ್ತು
ಶಕ್ತಿ ಬಂದುಬಿಡ್ತು
ಸಣ್ಣಗೆ ನೇವರಿಸಿದ ಮಣ್ಣ ಘಮಲು
ಮೂಗೆಲ್ಲ ಎಡತಾಕಿದಾಗಾ
ನೆಟ್ಟ ಗಿಡಗಳು ಮೈ ಕೊಳೆ ತೊಳೆದು ತೊನೆದಾಡುವಾಗಾ…..
ಆಹಾ! ನೋಡೋಕೆ ಕಣ್ಣೆರಡು ಸಾಲದು!

ಬಪ್ಪರೆ ಮೊದಲ ಮಳೆಯೇ
ಮತ್ತೆ ಬಂದು ಬಿಡು
ತಣ್ಣಗಾಯಿತು ಮನ
ಉರಿ ಕೆಂಡ ಹೊತ್ತ ಹಂಡೆ ಒಲೆಗೆ
ಬುಸ್…ಎಂದು
ತಣ್ಣನೆಯ ನೀರು ಸುರಿದಂತೆ!

20-4-2019. 6.00pm

ಬಸಿರ ಬಾಗಿನಕೆ ಮೈ ಚೆಲ್ಲಿ.. …..

ನಗುವ ಹೂವಿಗೆ ಬಣ್ಣದ ಚಿತ್ತಾರ ಬಿಡಿಸಿ
ಅಂದಗೊಳಿಸುವ ಇರಾದೆ ಏಕೆ
ಬದುಕ ಬಟ್ಟಲೊಳು ತನ್ನತನದ ಸೌಂದರ್ಯ
ಸೂಸುತಿರುವ ಅಪ್ಪಟ ಚಿನ್ನ
ಬೆಳ್ಳನೆಯ ಬೆಳಗು ಭುವಿಗೆಲ್ಲ ಶೃಂಗಾರ
ತನ್ನೊಡಲ ಒಡ್ಡೋಲಗಕೆ ಅನುಗೊಳಿಸುವ
ವೈಖರಿ ಮಂಜಿನ ಮುತ್ತು ಕೆನ್ನೆ ತಟ್ಟಲು
ಅರಳುವುದ ನಾನೆಂತೂ ಒಂದು ದಿನ ಕಾಣೆ!

ಭಗವಂತ ಈ ಭೃಹ್ಮಾಂಡದ ತುಂಬೆಲ್ಲ
ಎನಿತು ವಿಸ್ಮಯ ಬಚ್ಚಿಟ್ಟೆ
ದಿನಕೊಂದೊಂದು ಲಲನೆಯರಳಸಿ
ಮುದ್ದಾದ ಚೆಲುವು ಕಣ್ತುಂಬಿಕೊಳ್ಳಲು
ಮಾಘಿಯ ಚಳಿ ತುಂತುರು ಹನಿ
ಮುತ್ತಾಗಿ ಕಚಗುಳಿ ಇಡುತಿರುವ
ಆಹಾ! ಆ ಅಂದವ ಆನಂದವ ಎನಿತು ಬಣ್ಣಿಸಲಿ!

ಕಿರುಲತೆಗಳಲಿ ಉಯ್ಯಾಲೆಯ ಓಕುಳಿ
ಬರುತಿರುವ ರವಿಕಿರಣಕೆ ಮುಖ ಮಾಡಿ
ಮೈ ತುಂಬ ಅರಳಿಸುತ ಹೂ ಗೊಂಚಲು
ಅಣಿಯಾಗುತಿವೆ ಬಸಿರ ಬಾಗಿನಕೆ ಮೈ ಚೆಲ್ಲಿ
ಗೆಲ್ಲು ಗೆಲ್ಲುಗಳಲಿ ಹೂ ಮಿಡಿ ಕಾಯಿ ಹಣ್ಣಾಗಲು
ಮತ್ತೆ ಭೂರಮೆಯ ತಬ್ಬಿ ಮೊಳಕೆಯೊಡೆದು ಚಿಗುರಲು
ಅಬ್ಭಾ! ಎಂಥಾ ಹರೆಯ ಕೆಂದಾವರೆಯಷ್ಟು ನಾಚಿಕೆಯವಕೀಗ!
9-1-2019. 10.16am

ಏನಾದರೂ ಹಿಕ್ಮತ್ ಇದ್ದಿದ್ದರೆ…….

ಅನಿರೀಕ್ಷಿತ, ಅವ್ಯಾಹತ
ಮೊನ್ನೆ ನಡೆದ ಭೀಬತ್ಸ ಮಳೆ
ಗುಡ್ಡ ಕಡಿದುರುಳಿ
ನೆಲ ಕೆಂಪು ಮಣ್ಣಿನ ಹಾಸು
ಮನೆ ಮಠ
“ಕುಂಬಾರನಿಗೆ ವರುಷ ದೊಣ್ಣೆಗೆ ನಿಮಿಷ”
ಮೊರೆತ ಕೇಳದೆ
ಆ ದೇವನೂ ಕಲ್ಲಾಗಿಬಿಟ್ಟ.

“ಮತ್ತೆ ಮಳೆಯ ಅಬ್ಬರ ಮುಂದುವರೆದಿದೆ
ಭೂಮಿಯಲ್ಲಿ ಕಂಪನ
ಅಲ್ಲಲಿ ಮತ್ತೆ ಗುಡ್ಡ ಕುಸಿತ
ಜನರ ಬವಣೆ ಹೇಳತೀರ”

ಯುದ್ಧೋಪಾದಿಯಲ್ಲಿ
ಆತಂಕ ಹೊತ್ತ ಸಮಾಚಾರ
ಹೃದಯದಾಳಕ್ಕಿಳಿದು
ಉಂಡನ್ನ ಗಂಟಲು ಕಟ್ಟುವ ಸ್ಥಿತಿ
ಮತ್ತೆ ಮತ್ತೆ ಮಳೆಯಾಗುತ್ತಿದೆಯಲ್ಲಾ
ಆಕಾಶಕ್ಕೆ ತೂತು ಬಿದ್ದಂತೆ!

ಚಿತ್ತದಲಿ ರಾಮ ರಾವಣರ ಯುದ್ಧದ
ಸನ್ನಿವೇಶ ನೆನಪಾಯಿತು
ರಾಮಾಯಣದ ಕಥೆ ದಿಟವೋ ಸುಳ್ಳೋ
ಆದರೀಗಿಲ್ಲಿ
ಎಲ್ಲವೂ ಕಣ್ಣ ಮುಂದಿನ ಸತ್ಯ.

ಕೆಟ್ಟ ಮಳೆ
ಜನ ಕಂಗಾಲು
ಲಭೋ ಲಭೋ ಹೊಯ್ಕೊಳ್ಳುವಾಗ
ಈ ಮಳೆ ತಡೆಯಲು
ಏನಾದರೂ ಹಿಕ್ಮತ್ ಇದ್ದಿದ್ದರೆ….?

ಅದೇ ರಾಮ ರಾವಣರ ಯುದ್ಧದಲ್ಲಿ
ರಾವಣನ ತಲೆ ಕಡಿದುರುಳಿಸಿದಷ್ಟೂ
ಮತ್ತೆ ಬೆಳೆಯುತ್ತಿತ್ತು
ರಾವಣನ ಕೊಲ್ಲಲಾಗದೆ
ರಾಮ ಕೈ ಸೋತ
ವಿಭೀಷಣ ದೇಹದತ್ತ ಗುರಿಯಿಡಲು ಸೂಚಿಸಿ
ರಾವಣನ ಜೀವದ ಗುಟ್ಟು ಹೇಳಿಬಿಟ್ಟ
ರಾವಣ ಸತ್ತ
ರಾಮ ಗೆದ್ದ.

ಆಗ ರಾಮ ರಾವಣರ ರಾಜ್ಯ ಸರಿ
ಈಗಿಲ್ಲಿ ನಮ್ಮ ರಾಜ್ಯ
ಯಾವುದಾದರೇನು ಕಣ್ಣಿಗೆ ಕಾಣುವ ದುಷ್ಟನಾಗಿ
ಮಾರಣ ಹೋಮ ನಡೆಸುತ್ತಿರುವ
ಈ ಮಳೆರಾಯನ ಗುಟ್ಟು
ಯಾರಿಂದಲಾದರೂ ಹೇಗಾದರೂ
ಮೂಲ ದೊರಕಿದ್ದರೆ…………
ತಲೆಕೆಟ್ಟಂತೆ ಉಧೋ ಉಧೋ
ಹೊಯ್ಯುವ ಮಳೆ ನಿಲ್ಲಿಸಬಹುದಿತ್ತಲ್ಲಾ
ರಾಮ ರಾವಣನ ಯುದ್ಧ
ಕೊನೆಯಾದಂತೆ!!

29-8-2018. 7.01pm

ವಸಂತಾಗಮನ

ಚಂದ್ರ ಚಕೋರಿಯ ಮೃದು ಕಂಠದೈಸಿರಿಯಲಿ
ಹೊರಹೊಮ್ಮುತಿದೆ ಮೌನದಾಲಾಪನೆಯ
ಸುಶ್ರಾವ್ಯ ಗಾನ.

ಇನಿಯನ ಹೊಸ ಹೆಜ್ಜೆಗೆ ಗೆಜ್ಜೆ ಕಟ್ಟಿ
ಸಜ್ಜಾಗಿದೆ ಮರಿ ಕೋಗಿಲೆಗಳ
ಕುಹೂ ಕುಹೂ ನಿನಾದ.

ಅಭಿಸಾರಿಕೆ ಅರಮನೆಯ ಬಾಗಿಲು
ತಳಿರು ತೋರಣಗಳ ದಿಬ್ಬವನೇರಿ
ಲಕ ಲಕಾ ಹೊಳೆಯುತಿದೆ.

ಬೆಂಗಾಡಿನ ಬಯಲೊಳಗೆಲ್ಲ
ಹಸಿರು ಮುಂಜಾವಿನ ಹೊದಿಕೆ ಹೊದಿಸಿ
ತನು ತಂಪಾಗಿದೆ.

ವಸಂತಾಗಮನಕೆ ಮನ ಮನದೊಳಗೆಲ್ಲ
ಅಂಬುದಿಯ ಮೇಘೋದ್ಗರ್ಷ
ಕವಿ ತಾ ಮೈ ಮರೆತಂತಿದೆ.

ಗುಯ್ ಗುಯ್ ನಾದದ ಜೇನ ಪರದಾಟ
ಹೂಮೊಗವರಳಿ ತಾಯ್ತನಕೆ ಸಜ್ಜಾಗಿವೆ
ನಾಚಿ ನೀರಾಗಿ.

ಬಿಸುಪಿನ ಬಿರು ನಡಿಗೆಯು ಮೈತಳೆದಿದೆ
ಗಿಡಮರ ಹೂ ಬಳ್ಳಿಗಳಲೆಲ್ಲ ಮೊಗ್ಗು ಕಾಯಾಗಿ
ಹಣ್ಣೆವೆಯಿಕ್ಕಿದೆ.

ಕಪೋಲದ ತುಂಬೆಲ್ಲ ಕೆಂಪಡರಿದ ಸೊಗಡು
ಹಸಿರು ಮುಂಜಾವಿನಲಿ ಒಡ್ಡೋಲಗದ ಹುರುಪು
ಅದೋ ವಸಂತ ಕಾಲಿಕ್ಕಿದೆ.

ಜರಿ ತೊರೆಗಳು ಬಣ್ಣ ಕಳೆಯುವ ಮೊದಲು
ಓ ಮೇಘರಾಜಾ ಆಗೊಮ್ಮೆ ಈಗೊಮ್ಮೆ ಇಳೆಯನಪ್ಪು
ರೈತರ ಸಂತಸಕೆ ಇಂಬನಿತ್ತು.

ಪ್ರಕೃತಿ ಪುರುಷನ ಸಮ್ಮಿಲನಕೆ ಸಾಕ್ಷಿ ವಸಂತಮಾಸ
ಸಲ್ಲಾಪದ ಆಲಾಪನೆಯೊಳು ಮುಳುಗೇಳಲಿ ಬಿಡು ಮನುಜಾ
ನೀ ನಾಶ ಮಾಡದಿರು ಸೃಷ್ಟಿಯ ಒಡಲಾ!!

26-3-2018. 7.21pm

ಮರುಕ

ಚಿಗುರು ಚಿಗುರೆಲೆ ಮರವೆ
ಎಲೆ ಉದುರಿಸಿ ಬಟಾಬಯಲಲಿ ನೀ ನಿಂತಿಹೆ ಏಕೆ?

ನಿನ್ನ ಮಾಸಿಕ ಕಳೆದರೂ
ಚಿಗುರೊಡೆಯಲು ಏಕೆ ಈ ಅನುಮಾನ ಹೇಳು?

ಮೋಡದಾ ಮುಗಿಲಲಿ
ಮಳೆ ಕೊಯ್ಲ ಆಗಮನಕೆ ಕಾದು ಕುಳಿತಿಹೆಯೇನು?

ನೀ ಚಿಗುರು ಮರವೆ
ಕೊರಡು ಕೊನರಿಸುವ ಉತ್ಸಾಹ ನಿನಗಿಲ್ಲವೇನು?

ಮ್ಲಾನ ಮುಖವೇಕೆ ಮಾಡಿದೆ
ಮರಕಡಿವ ಮಂದಿಗೆ ನೀ ಹೆದರಿಬಿಟ್ಟೆಯೇನು?

ದಿನ ದಿನವೂ ಬಿಡದಿಹ
ನಿನ್ನ ಬವಣೆಗೆ ಕೊನೆಯಿಲ್ಲವೆಂಬ ಆತಂಕವೇ?

ಎಷ್ಟು ಕ್ರೂರ ಈ ಜನರು
ಎಂದು ಒಳಗೊಳಗೆ ನೀ ಕೊರಗುತಿಹೆಯೇನು?

ದಾಹ ದಾಹವೆಂದು
ಹಪಹಪಿಸುತಿಹೆ ಇಂದು ; ಇದು ನನಗೆ ಗೊತ್ತಿಲ್ಲವೇನು?

ನಿನ್ನ ಅವಸ್ಥೆ ಕಂಡು
ನಾನೂ ನಿತ್ಯ ಮರುಗುತಿಹೆನಿಲ್ಲಿ ನೋಡು!

16-3-2018. 10.58am

ಸಮಾಗಮ

ಅಂಬರದ ಚುಕ್ಕಿಗೆ ಚಂದ್ರಮನು ಬೇಕಿಲ್ಲ
ಬೆಳದಿಂಗಳಂಗು ನನಗಿಲ್ಲವೆಂದುಲಿವ
ತಾರೆಗಳ ತೋರಣ ಕಟ್ಟಿ ಚಂದ್ರನ ಕೂಡಿಸಲಾಗಿ
ಪಳ ಪಳನೊಳೆಯುವ ಮುದ್ದು ಕುವರನ
ಮುಖಾರವಿಂದವದೆಷ್ಟು ಅಂದವೊ ನಾ ಕಾಣೆ!

ಹದಿನಾರು ನವ ತರುಣಿಯರು ಜರತಾರಿ ಸೀರೆಯಲಿ
ಸುತ್ತೆಲ್ಲ ನೆರೆದಿರಲು ಚಂದ್ರವದನೆಯ ಸೊಬಗು
ಲಲನೆಯರಲಿ ಮೇಳೈಸಿರಲು ಲಕ ಲಕ ಮಿನುಗುವ
ನಕ್ಷತ್ರಗಳ ಪಾಡು ಕಂಡಾಗ ಚಂದ್ರಮಗೆ
ಅದೆಷ್ಟು ಇರುಸು ಮುರುಸಾಗುವುದೊ ನಾ ಕಾಣೆ!

ಆಕಾಶದಂಗಳದಿ ಉದ್ಭವಿಸುವ ಮಿಂಚುಗಳು
ಅಲ್ಲಲ್ಲಿ ತೂರಿಬರುವ ಕಿರಣದಕ್ಕರೆಯಂತೆ
ಝಳಪಿಸುವ ಕತ್ತಿಯ ಕೋರೈಸುವ ಬೆಳಕಿನಲಿ
ಚಂದ್ರಮನಿಗಿಡಿದಿಟ್ಟ ಕನ್ನಡಿಯಂತೆ ಪ್ರಜ್ವಲಿಸಲು
ತಾರೆಗಳ ಗೋಳೈಸಿಕೊಳ್ಳುವೀರ್ಶೆದೇಗಿರುತ್ತೊ ನಾ ಕಾಣೆ!

ಮುತ್ತಂತ ಮತ್ತಿನಲಿ ಕಚಗುಳಿಯಿಡುವ ತಾರೆಗಳು
ಲಲನಾಂಗಿಯರ ಮದ್ಯ ಮೇಳೈಸುವ ಗಮ್ಮತ್ತು
ಆಹಾ! ಚಂದ್ರಾ ಏನೊ ನಿನ್ನ ಖರಾಮತ್ತೆಂದುಲಿವ
ಮರೆಯಾದ ಸೂರ್ಯ ಸಟಕ್ಕನೆ ಎದ್ದು ಬಂದಲ್ಲಿ
ಮೂವರ ಸಮಾಗಮ ಅದೇಗಿರುತ್ತೊ ನಾ ಕಾಣೆ!

ಭುವಿಚಕ್ರ ತಿರುತಿರುಗಿ ಉಣಬಡಿಪ ವ್ಯಂಜನಗಳನೆಲ್ಲ
ಸೊಬಗ ಸೂರೆಗೊಳ್ಪ ಭೋಜನವ ಚಪ್ಪರಿಸಿದರೂ
ಮನುಜಾ ಆಕಾಶಕಾಯದ ಸಾಂಗತ್ಯಕ್ಕೆ ಮಿಗಿಲುಂಟೆ?
ಚಿಂತನೆಯ ದಾಸ್ಯಕ್ಕೆ ಶರಣಾಗಿ ಕವಿ ಬರೆವ ಹಾಡು
ಆಕಾಶಕಾಯದಂತೆ ಬದುಕಿನಾಚೆಗೂ ಬದುಕಬಹುದೆ ನಾ ಕಾಣೆ!

7-9-2017. 9.33am