ಊರ್ಮಿಳೆ

ಸಖೀ ಕ್ಷಮಿಸೆನ್ನ ಮನದನ್ನೆ
ಅಂದು ನಿನ್ನಪ್ಪಣೆ ಕೇಳದೆ
ಭಾತೃತ್ವದ ಪಾಶದಲಿ ಸಿಲುಕಿ
ರಾಮನೊಡಗೂಡಿ ಹೊರಟೇ
ಹೋದೆನೆಂಬ ಲವಲೇಷ
ಕೋಪವಿರುವುದು
ನನಗೆ ಗೊತ್ತು ಪ್ರಿಯೆ.

ಆದರೂ. …….
ನೀನೆನ್ನ ತಡೆಯದೆ
ಅವರೆಲ್ಲರೊಡಗೂಡಿ ಅಳುತ
ಸೀರೆಯ ಸೆರಗ ತುದಿ
ಕಣ್ಣು ಒರೆಸುವುದ ಕಂಡ ಮನ
ಮರೆತಿಲ್ಲ
ಹೇಳು ಒಡತಿ
ತಪ್ಪಾಯಿತೆ ನನ್ನಿಂದ!

ಬಿಡು ಬಿಡು
ಆಗಿದ್ದು ಆಗೋಯ್ತು
ಈಗ್ಯಾಕೆ ಆ ಮಾತು
ಸಧ್ಯ ಕ್ಷೇಮದಿಂದ ಬಂದೆಯಲ್ಲ
ನನ್ನ ಸಖಾ!

ಹೀಗಂದು
ಅವಳೇ ಸಂತೈಸಿರಬಹುದು
ಹದಿನಾಲ್ಕು ವರುಷ
ಅರಮನೆಯೆಂಬ ಸೆರೆಮನೆಯಲ್ಲಿ
ತಾ ಬಂಧಿ, ಏಕಾಂಗಿ
ವಿರಹ ವೇದನೆ ನುಂಗಿ.

ಇತಿಹಾಸದ ಉದ್ದಗಲಕ್ಕೂ
ಸ್ತ್ರೀ ಅಂದರೆ
ನಿನಗಿಷ್ಟೇ ಸಾಕು
ಎಂದರಚಿದ
ಗಂಡಿನ ಖಾರುಭಾರೆ
ಮೆರೆದಿರುವಾಗ
ಇನ್ನು ಊರ್ಮಿಳೆ
ಹೇಗೆ ಹೊರತಾದಾಳು!!
18-3-2017. 7.09pm

ಸಂಧಿ ಕಾಲ

ದ್ವಾಪರ ಮುಗಿದು ಕಲಿ ಹೆಜ್ಜೆ ಇಡುವ ಹೊತ್ತು
ಪ್ರತಿಯೊಂದು ಯುಗದ ಸಂಧಿಗೂ ನೆತ್ತರು ಹರಿಯಬೇಕೆನೊ!

ಹಿಂದೆ ತ್ರೇತಾ ದ್ವಾಪರ ಯುಗದ ಸಂಧಿ ಕಾಲ
ಪರಶುರಾಮನಿಂದ ನಡೆದ ಕ್ಷತ್ರಿಯ ಸಂಹಾರದಲ್ಲಿ
ಸಮಂತ – ಪಂಚಕ ಹೆಸರಿನ ಐದು ರಕ್ತ ಕೊಳದ ಸುತ್ತ
ಆವಾಸ ಬೆಳೆದು ಕ್ಷೇತ್ರವೇ ಆಗಿಬಿಟ್ಟಿತು.

ಯುಗಾಂತದ ಇತಿಹಾಸ ಮಹಾಭಾರತದಲ್ಲಿ ಮಡುಗಟ್ಟಿದೆ
ಹದಿನೆಂಟು ಅಕ್ಷೌಹಿಣಿ ಸೇನೆ ಹೊತ್ತ ಕುರುಕ್ಷೇತ್ರ
ಧರ್ಮ ಕ್ಷೇತ್ರವೆಂದು ಹೆಸರಾಯಿತು.

ಯುದ್ಧದಲ್ಲಿ ದುಯೋ೯ಧನನ ತೊಡೆ ಮುರಿದು
ಸತ್ತ ದಿನದಿಂದ ಕಲಿ ಯುಗಾರಂಭವಂತೆ
ಅಂದು ನೆತ್ತರಿನಲ್ಲಿ ಭೂತಾಯಿ ಜಳಕವಾಡಿದಳು.

ಆದರೆ ದ್ವಾಪರದಲ್ಲಿ ಕುಶಲ ಕೃಷ್ಣನಿದ್ದನಲ್ಲವೇ?
ಯುಗದ ಪ್ರಭಾವಕ್ಕೆ ಅವನೂ ಒಳಗಾದವನಲ್ಲವೆ?

ಮುಂದಿನ ಮೂವತ್ತಾರು ವಷ೯ ಕಲಿ ಕಾಲಿಡದೆ
ಕೃಷ್ಣನಿಗೆ ತನ್ನಾಡಳಿತ ವಹಿಸಿ
ಮರೆಯಲ್ಲಿ ನಿಂತು ಸಂಧಿಗಾಗಿ ಕಾಯುತ್ತಿದ್ದನಂತೆ.

ಕಲಿಯುಗದ ಮೊದಲ ರಾಜ ಯುಧಿಷ್ಟಿರ ಎಂದೆನಿಸಿ
ಕೃಷ್ಣ ಕಾಲವನ್ನೆ ಕಬಳಿಸುವ ‘ಕಾಲ’ ಎಂದೇಳಿಕೊಂಡ.
ಇದು ಯುಗ ಸಂಧಿಯ ಇನ್ನೊಂದು ಮುಖ.

ಮೂವತ್ತಾರನೆಯ ವಷ೯ದ ಕೊನೆ
ಆವೇಶದಿಂದ ಪ್ರಕಟಗೊಂಡ ಕಲಿ.

ಯುಧಿಷ್ಟಿರನ ಆಳ್ವಿಕೆಯ ಯಾದವರ ಕಾಲದ ಕೊನೆ
ಹುಲ್ಲೊಂದು ನೆವವೆಂಬಂತೆ ಗೊಲ್ಲರ ಕುಲ ನಾಶ
ಯಾದವೀ – ಕಲಹ ಎಂಬ ನಾನ್ಣುಡಿ ನೆಲೆಯಾಯಿತು.

ಕೊನೆಯುಸಿರೆಳೆವಾಗ ದುಯೋ೯ಧನ ಹೇಳಿದನಂತೆ
ಕ್ಷತ್ರಿಯ ಧರ್ಮ ಪರಿಪಾಲಿಸಿ ಕೃಷ್ಣನನ್ನು ಮೀರಿಸಿದೆ
ಇಲ್ಲಿ ಸೋತರೂ ಅಕ್ಷಯವಾದ ಪರಲೋಕ ಪಡೆಯುವೆ.

ಅವನಿಗೆ ಛಲಕ್ಕೆ ಪಾಂಡವರ ವಿರೋಧ ನೆಪ ಮಾತ್ರ
ತಮ್ಮ ನೆಲದ ಮೇಲೆ ದೈವ ಕಾಲಿಡುವುದು ಬೇಕಿರಲಿಲ್ಲ.
ಕೃಷ್ಣನಿಗೆ ಬೇಕಿತ್ತು ನಿಮಿತ್ತ ಮಾತ್ರ ಆಟ ಆಡಿಸುವವ ಅವನಲ್ಲವೆ?

ಇತಿಹಾಸದ ಉದ್ದಗಲಕ್ಕೂ ಕೆದಕಿ ನೋಡಿದಾಗ
ಧರ್ಮಕ್ಕಾಗಿ ಹೋರಾಟ, ಛಲದ ನೆಲೆಗಟ್ಟಿನ ತುತ್ತ ತುದಿ
ಹತ್ತಿಯಾದರೂ ಸರಿ ಮರಣದಲ್ಲೂ ಗೆಲುವಿನ ನಲಿವು.

ಮುಳ್ಳಿನ ಮಂಚದಲಿ ಮರಣಶಯ್ಯೆಯಲ್ಲೂ ಕಾದ ಭೀಷ್ಮ.
ಅಗಸನ ಮಾತು ಕೇಳಿ ಸೀತೆಯನ್ನೆ ಕಾಡಿಗಟ್ಟಿದ ರಾಮ!
13-9-2016. 6.32pm