ಮಳೆರಾಯನ ಮುನಿಸಿಗೆ ಬಲಿಯಾಗಿ
ಬದುಕಾಯಿತು ಮೂರಾಬಟ್ಟೆ
ಬದುಕಿನುದ್ದಕ್ಕೂ ಶ್ರಮ ಪಟ್ಟು ಗಳಿಸಿದ
ಆಸ್ತಿ ಪಾಸ್ತಿ ಅಂತಸ್ತು ನೀರಲ್ಲಿ ಕರಡಿದ ಹೋಮ
ನಾನೂ ಕೂಡಾ ಒಬ್ಬ ನಿರ್ಗತಿಕನಾದೆ
ನಿರಾಶ್ರಿತರ ಶಿಭಿರದಲ್ಲಿ ನಡುಗುತ್ತ ಕೂತು
ಅವರಿವರು ಕೊಟ್ಟ ಆಹಾರ ಪೊಟ್ಟಣಕ್ಕೆ
ಕೈ ಒಡ್ಡುವಂತಾಯಿತಲ್ಲ ನನ್ನ ಗತಿ.
ಹೊಸದಾಗಿ ಮದುವೆಯಾದ ಹೆಣ್ಣು ನಾನು
ಬಲಗಾಲಿಟ್ಟು ಅತ್ತೆಯ ಮನೆಗೆ ಬಂದು
ಇನ್ನೂ ಕಳೆದಿಲ್ಲ ಒಂದು ವರ್ಷ
ಆಶಾಡ ಮಾಸ ಮುಗಿಸಿ ಇಂದಷ್ಟೇ
ಗಂಡನ ಮನೆಗೆ ಬಂದು ಕೂತಿದ್ದೆ
ನೋಡ ನೋಡುತ್ತಿದ್ದಂತೆ ಗುಡ್ಡ ಕುಸಿದು
ಕೊಚ್ಚಿ ಬಂದ ಹಳ್ಳ ಮನೆಯನ್ನೇ ಮುರಿದಿತ್ತು
ಓಡಲಾಗದೆ ನಾವಿಲ್ಲೇ ಮಣ್ಣಾಗಿವೆವೀಗ.
ಹಸಿ ಬಾಣಂತಿ ಹಸುಗೂಸ ಹೊತ್ತು
ಥಂಡಿ ನೆಲದಲಿ ಥರ ಥರ ನಡುಗುತ್ತ
ರಕ್ಷಕರ ಕೈ ಹಿಡಿದು ನಡೆಯುವ ಗತಿ ಬಂತು
ಸನ್ನಿ ಆಗುವುದು ತಣ್ಣೀರು ಮುಟ್ಟದಿರು
ಅಮ್ಮನ ಕಿವಿ ಮಾತು ಗುಣುಗಣಿಸಿದ್ದು
ತೆಕ್ಕೆಯ ಕೂಸಿಗೆ ಹಾಲುಣಿಸಲಾಗದಷ್ಟು
ನಡುಕವೆರಗಿಹುದು ಭಗವಂತ
ನೀನೇ ನಮ್ಮ ಕಾಪಾಡು ತಂದೆ.
ಭಾಷೆ ಗೊತ್ತಿಲ್ಲ ಜನ ಪರಿಚಯವಿಲ್ಲ
ಕಾಫಿ ತೋಟದಲಿ ದುಡಿಯಲು ಬಂದ
ಹಿಂದಿ ಭಾಷೆಯ ಅಲೆಮಾರಿಗ ನಾನು
ವರುಣನಾರ್ಭಟಕೆ ಹೆದರಿ ಹೈರಾಣಾಗಿ
ಅಂಬರದ ಚಂದಿರ ಕಾಣುವ ಹೊತ್ತಲ್ಲಿ
ಅನಾಥವಾಗಿ ನೀರಲ್ಲಿ ತೊಳಲಾಡುತ್ತಿರಲು
ಅನಾಮತ್ತಾಗಿ ಎತ್ತಿ ಅಂಗಾತ ಮಲಗಿಸಿ
ಹೊತ್ತೊಯ್ದು ಜೀವ ರಕ್ಷಿಸಿದ
ಮಹಾನುಭಾವರಿಗೆ ಶರಣೆಂಬೆ ನಾನು.
ಅದೋ ಅದೋ ಗುಡ್ಡ ಕುಸಿಯುತಿದೆ
ಆ…..ಆ…ಮನೆ ಕೂಡಾ ಬೀಳುತ್ತೆ ಕಣೆ
ಅಯ್ಯೋ ಅಯ್ಯೋ ಬಿತ್ತು ಬಿತ್ತು ರಾಮಾ….
ಏಯ್ ಪಕ್ಕದ ಮನೆನೂ ಬೀಳುತ್ತೆ
ಜನ ಇದ್ದಾರಾ ಮನೆಯಲ್ಲಿ ಏನೊ ಗೊತ್ತಿಲ್ಲ
ದೂರದಲಿ ಕಂಡ ದೃಶ್ಯ ಸೆರೆ ಹಿಡಿದು
ಮು.ಪು.ದಲಿ ಹರಿಯ ಬಿಟ್ಟು
ಕರುಳು ಮಿಡಿಯಲು ಕಾರಣರಾದ
ನಾ ಕಂಡ ಊರಿನ ಜನರಿವರು.
ಕಂಡಿದ್ದೆ ಚಂದದ ಊರು ಕೊಡವರ ನಾಡು
ಕಾಫಿ ತೋಟದ ಬಿಳಿ ಹೂವಿನ ಘಮಲು
ಚಂದವಳ್ಳಿ ತೋಟದಲ್ಲಿ ಅರಳಿದ ಹೂ ಮೊಗ್ಗು
ತಲಕಾವೇರಿ, ಭಾಗಮಂಡಲ, ಮಕಂದೂರು
ನಾಪೊಕ್ಲು ನನ್ನೊಡೆಯನ ತವರೂರು
ಈಗಲ್ಲಿ ನೋಡಲೇನಿದೆ ಹೇಳಿ ಬರಿ ಮಣ್ಣು
ಜನರ ಕಣ್ಣೀರು, ಮೂಕ ಪ್ರಾಣಿಯ ರೋಧನ
ಪ್ರಕೃತಿ ಕೊಟ್ಟ ಕೊಡುಗೆ ಆ ದೇವರಿಗೇ ಪ್ರೀತಿ!!
19-8-2018 9.67pm
