ಹರೆಯ

ಹರೆಯದ ಬಾಲೆಗೆ
ನೂರು ಹಗಲುಗನಸು
ಕಚಗುಳಿ ಇಡುವ ಮನಸು
ಅಪ್ಸರೆಯ ನೋಟದಲಿ
ರಂಗಾಗುವುದು ಗುಳಿ ಕೆನ್ನೆ.

ದೂರ ಬಲು ದೂರ
ನಾಳೆಯ ಭವಿತವ್ಯ
ನಶೆಯೇರಿದ ನವ ತರುಣಿ
ಕಾಣುವಳು ರಾತ್ರಿ ಹಗಲು
ಹೊಸ ಹೊಸ ಕನಸು.

ಆಕಾಶ ದೀಪದಲಿ
ಅಧರದಲಿ ಅವಿರ್ಭವಿಸುವ
ಸುಮಧುರ ಗಾನ
ಗುನುಗುನಿಸುವ ಕಂಠಕೆ
ಇನ್ನಿಲ್ಲದ ಮಾಧುರ್ಯ.

ನಭೋ ಮಂಡಲದ ತುಂಬೆಲ್ಲ
ನರ್ತಿಸುವ ಗೆಜ್ಜೆಯ ಹೆಜ್ಜೆ
‘ಥದಾಂಗುತಕಧಿಮಿ ತೋಂ’
ಪುಳಕಿತದಲಿ ಕುಣಿಯುವಳು
ಇಳೆಯನ್ನೇ ಮರೆತು.

ಹೊಂಗನಸಿನ ಹೂರಣಕೆ
ತನುಮನವೆಲ್ಲ ಮೇಧಿನಿ
ಮುತ್ತಿಕೊಂಡ ಧಾರೆಗೆ
ಜಿಗಿದುಬಿಡುವ ತವಕ
ಕೈಗೆಟುಕದ ಬಾನೆತ್ತರಕೆ.

ಮನಸು ಹುಚ್ಚು ಕೋಡಿ
ಹದಿಹರೆಯಕೆ ಇಲ್ಲ ಇತಿಮಿತಿ
ಕಣ್ಣು ಹೊಳಪು ತುಟಿ ಕೆಂಪು
ಮನಸಿನ ಉತ್ಕಲನಕೆ
ಇನ್ನಿಲ್ಲದ ಇರಾದೆ!

21-7-2017. 8.26am

Advertisements

ಗೆಜ್ಜೆ ಗತಿ

ಅಂದದ ಚಂದದ
ಮುತ್ತಿನ ಗೆಜ್ಜೆ
ಲಕ ಲಕ ಹೊಳೆಯುವ
ಬೆಳ್ಳಿಯ ಗೆಜ್ಜೆ॥

ಜಿಣಿ ಜಿಣಿ ನಾದವ
ಉಲಿಯುವ ಗೆಜ್ಜೆ
ತಕಥೈ ತಾಳಗೆ
ಕುಣಿಯುವ ಗೆಜ್ಜೆ॥

ಕೆಂಪಿನ ಹಸಿರಿನ
ಚುಕ್ಕೆಯ ಗೆಜ್ಜೆ
ಅಕ್ಕಸಾಲಿಗನ
ಕೈಲರಳಿದ ಗೆಜ್ಜೆ॥

ಅಂಗಡಿ ಕಪಾಟಲಿ
ನೇತಾಡುವ ಗೆಜ್ಜೆ
ಕಣ್ಣಿಗೆ ಕಾಣಲು
ಖರೀದಿಸಿದ ಗೆಜ್ಜೆ॥

ಮುದ್ದು ಮಗಳಿಗೆ
ಕೊಡಿಸಿದ ಗೆಜ್ಜೆ
ಕಂಡವರನೆಲ್ಲ
ಸೇಳೆಯುವ ಗೆಜ್ಜೆ॥

ಕಾಲ ಸರಿದಂತೆ
ಹಾಕದ ಗೆಜ್ಜೆ
ಲಾಕರ್ ಬಂಧಿ
ಆಯಿತೀ ಗೆಜ್ಜೆ॥

ಬದುಕಿನ ಸ್ಥಿತಿಗತಿ
ಸಾರುವ ಗೆಜ್ಜೆ
ಕೊನೆಯಲ್ಲಿನ ಕ್ಷಣ
ಉಲಿಯುವ ಗೆಜ್ಜೆ॥

26-9-2018 2.36pm

ಹಕ್ಕಿಯ ಕೂಗು

ಸಂಜೆಗೆಂಪು ಮೂಡುತಿರಲು
ಹಕ್ಕಿ ತಾಣ ಹುಡುಕುತಿರಲು
ಬೋಳು ಮರದ ಎದೆಯ ನೋವ
ಒಂಟಿ ಹಕ್ಕಿ ಹಾಡುತ್ತಿತ್ತು.

ಗೂಡು ಕಟ್ಟಲೆಂದು ಬರುವ
ಹಕ್ಕಿಗಿಲ್ಲಿ ಜಾಗವೆಲ್ಲಿ
ಎಲೆಗಳೆಲ್ಲ ಉದುರಿ ಉದುರಿ
ಬರಡಾಗಿದೆಯಲ್ಲ ನನ್ನ ದೇಹ.

ಪಾಪ ಅವು ಪಡುವ ಪಾಡು
ನಾನೆಂತೂ ನೋಡಲಾರೆ
ಬೇಗ ಬಾರೊ ಮಳೆರಾಯ
ಇಳೆಯ ನೀನು ತಂಪು ಮಾಡು.

ನೀರನೆಲ್ಲ ಹೀರಿ ಬೇಗ
ಚಿಗುರೊಡೆಯಬೇಕು ನಾನೀಗ
ಹಕ್ಕಿ ಗೂಡು ಕಟ್ಟಲೆಂದು
ಕಾಯುತೀರುವೆನೀಗ ನೋಡು.

ಹೂ,ಹಣ್ಣು,, ಕಾಯಿ ನೀಡಿ
ಅವುಗಳ ಕಲರವ ಕೇಳಬೇಕು
ಹಕ್ಕಿ ಸಂಕುಲ ನಶಿಸುತಿಹುದು
ಅದನು ತಡೆಯಲಿಂಬು ನೀಡು.

ಬತ್ತದಿರಲಿ ಭೂಮಿಯೆಂದು
ಕಾಡನುಳಿಸಿ ನಾಡ ಬೆಳೆಸಿ
ಪ್ರಾಣಿ ಪಕ್ಷಿ ಪೋಷಿಸಿರೆಂದು
ಮನುಜ ನಿನ್ನ ಬೇಡುತಿರುವೆ.

23-7-2018. 10.55pm

ನಾ ಶಬರಿ

ಚಿತ್ರ ಕವನ ಹವಿ-ಸವಿ ತಾಣದಲ್ಲಿ ತೃತೀಯ ಬಹುಮಾನ

**********

ಪಿಸು ಮಾತಿನ ಪಲ್ಲಕ್ಕಿಯ
ಜೋಡಿ ಹಕ್ಕಿಗಳಿಗಾಗಿ
ತಟಸ್ಥವಾಗಿ ನಿಂತಿರುವೆ
ಏರ ಬನ್ನಿ ಬೇಗಾ.

ಚಿಲಿ ಪಿಲಿ ಗುಟ್ಟುವ
ಹಕ್ಕಿಗಳ ಕಲರವ
ವನಸಿರಿಯ ಮಡಿಲಲ್ಲಿ
ಹೊತ್ತೊಯ್ಯುವೆ ನಿಮ್ಮ.

ತರುಲತೆಗಳ ಹೊಂಬಣ್ಣ
ರವಿಕಿರಣದಲಿ ಮಿಂಚಿಹುದು
ನನ್ನಾಂಗಕೂ ಅವನದೇ
ಬಂಗಾರದ ಸ್ಪರ್ಶ.

ನಾವಿಕನಿಲ್ಲದಿರೆ ಏನಂತೆ
ಮಜವಾಗಿ ನೀರೊಳೊಂದಷ್ಟು
ಕೊಂಚ ಕೈ ಬಡಿದು ಸಹಕರಿಸಿ
ಆತಂಕ ನಿಮಗ್ಯಾಕೆ.

ಕಪಟವ ನಾನರಿಯೆ
ನನ್ನ ಪ್ರತಿಬಿಂಬದಷ್ಟೇ ಸತ್ಯ
ನಿಮಗಾಗಿ ಕಾದಿರುವೆ
ರಾಮನ ಕಾದ ಶಬರಿಯಂತೆ!

8-7-2018. 5.47pm

ಚಿಗುರ ಸಂದೇಶ

ಅದುಮದಿರು ನನ್ನ
ನಾನಿನ್ನೂ ಚಿಗುರು.

ಹೆಬ್ಬೆರಳ ತಾಗಿಸದಿರು
ಮುರಿದಾವು ಚಿಗುರು.

ಈಗಷ್ಟೇ ಬಂದಿರುವೆ
ಮೊಳೆತಿದೆ ಚಿಗುರು.

ಪುಟ್ಟ ಅಂಗೈಯಗಲ
ನೋಡು ನನ್ನ ಚಿಗುರು.

ಚಪ್ಪಲಿ ತೆಗೆದಿಡು
ತಾಗಿ ಹರಿದಾವು ಚಿಗುರು.

ಒಡನೆ ನೆಲವನಗೆದು ನೆಡು
ಮೈತುಂಬ ಬೆಳೆದಾವು ಚಿಗುರು.

ಹೂ,ಮಿಡಿ,ಕಾಯಿ
ಹೊತ್ತು ಬರುವವು ಚಿಗುರು.

ನೆಟ್ಟು ಗಿಡಗಳ ಸಲಹು
ಬದುಕಾಗುವುದು ಚಿಗುರು.

ಚಿಗುರು ಚಿಗುರಲಿ ಜೀವ
ಉಸಿರಿರುವದ ನೀ ಕಾಣು.

ಗಿಡ, ಪಕ್ಷಿ, ಪ್ರಾಣಿಗಳ ಪೋಷಿಸಿ
ಸಾರ್ಥಕತೆ ನೀ ಹೊಂದು.

14-6-2018. 3.23pm

ಭಾವ ಶರಧಿ

ತುಂಬಿದಾಗಸದೊಳು
ಅರಳಿದ ಚಂದ್ರಮ
ಹುಣ್ಣಿಮೆಯ ಹಾಲ್ಗೆನ್ನೆ
ದುಂಡು ಮುಖದ ಅರಸ
ಆಹಾ! ಅವನಂದವ ನೋಡುತ
ಮೈ ಮರೆತಳು ಶರಧಿ॥

ಬಿಸು ಸುಯ್ದೆದೆಯೊಳು
ಪಕ್ಕನೆ ಅವನಿಟ್ಟ ಬಾಣ
ಒಡಲೆಲ್ಲ ಬೆಳ್ಳನ ಬೆಳಕು
ಎವೆಯಿಕ್ಕುವವನ ನೋಟಕೆ
ಮೈ ಪುಳಕಗೊಂಡು
ತನುವೆಲ್ಲ ತನನನ॥

ಭೋರ್ಗರೆದು ಧುಮ್ಮಿಕ್ಕುವಲೆ
ತಟಸ್ಥ ಮೌನ
ತನ್ನನೇ ತಾ ಮರೆತು
ಮನ್ಮಥನ ಬಾಣದಲಿ ಲೀನ
ಕಡಲಾಗಿಹಳು ಅಪ್ಸರೆ॥

ಸುತ್ತ ಯಾರಿಲ್ಲ ನೋಡು ಸಖೀ
ಬಾ ಬಡಿವಾರವೇಕೆ
ಕಗ್ಗತ್ತಲು ನಭೋಮಂಡಲ
ಬೆಳಕೆಲ್ಲ ನಿನ್ನೆಡೆಗೆ ಚೆಲ್ಲಿರುವೆ
ಎಷ್ಟು ಚಂದವೆ ನೀನು॥

ಏಯ್! ಹೋಗೊ ಚಂದ್ರಾ
ನಿನ್ನಂದದ ಮುಂದೆ
ನಂದೇನಿಲ್ಲಾ ಓಳು ಬಿಡಬೇಡಾ
ಅದೇನದು ಮುಖದಲ್ಲಿ
ಅದಾವ ಕಪ್ಪು ಚಿತ್ತಾರ?॥

ಇಬ್ಬರಲೂ ಮಾತು ಮಂಥನ
ಪುಟಿದೇಳುವ ಉತ್ಸಾಹಕೆ
ಸರಿದ ಕಾಲದ ಪರಿವಿಲ್ಲ
ಕೆಂಗಣ್ಣು ಬಿಟ್ಟ ಸೂರ್ಯ
ಗತಿಯಿಲ್ಲದೇ ದೂರಾದ ಚಂದ್ರ॥

30-6-2018. 5.04pm

ಹರೆಯ

ಹವಿ-ಸವಿ ತಾಣದಲ್ಲಿ ಈ ವಾರದ ಚಿತ್ರ ಕವನ ಸ್ಪರ್ಧೆ – ಸಮಾಧಾನಕರ ಬಹುಮಾನ

*************

ಜೊತೆ ಜೊತೆಯಾಗಿ
ಹೋಗುವ ಬನ್ನಿ
ಇಳೆಯನಪ್ಪುವ ಮೊದಲೆ॥

ಬಿಂಕ ಬಿನ್ನಾಣವೇಕೆ
ವಯ್ಯಾರದ ನಡಿಗೆಯೇಕೆ
ಚಂದದ ಬಣ್ಣವೆಂದೇ॥

ಪಳ ಪಳನೆ ಹೊಳೆಯುವ
ನಕ್ಷತ್ರದ ಮಿಂಚಂತೆ
ಆಹಾ! ನೀವೆಷ್ಟು ಚಂದ॥

ಇರಿ ಇರಿ ಪುಟಿದೇಳದಿರಿ
ನಿಂತಲ್ಲಿ ನಿಲಲಾರದ
ಯೌವನೆಯರೆ ನೀವು॥

ಅದು ಹಾಗೆ
ಹರೆಯದ ವಯಸು
ಲಂಗು ಲಗಾಮಿಲ್ಲದ ಕನಸು॥

ಏರಿ ಏರಿ ಜೌವ್ವನ
ಬಿಸಿ ರಕ್ತದ ಅಮಲು
ನೆಲ ಕಾಣದ ಹಗಲು॥

ನೀರ ಗುಳ್ಳೆಯ ತೆರದಿ
ಮುಟ್ಟಿದರೆ ಒಡೆಯುವ
ಬದುಕಲಿ ಹರೆಯವದು॥

ಶೃತಿ ತಪ್ಪಿದ ಅಹಮಿಕೆಯ
ಒಂದು ಕ್ಷಣದ ಬದುಕಾಗದಿರಲಿ
ಇರಲಿ ಕೊಂಚ ತಾಳ್ಮೆ॥

21.-6-2018. 8.08pm