ಜೀವನ

ಅಕ್ಷಿಯಲಿ ಕಣ್ಣೀರು
ಹೃದಯದಲಿ ಪನ್ನೀರು
ಚಿತ್ತದಲಿ ಯೋಚನೆ
ಮನಸಿನಲಿ ಯಾತನೆ
ಬುದ್ಧಿಯಲಿ ವಿಡಂಬನೆ
ಕ್ಷಣ ಕ್ಷಣವೂ ಆತಂಕ
ನಂಬಿಕೆಯಿಲ್ಲದ ನಾಳೆ
ಕ್ಷಣಿಕ ಸಂತೋಷ
ಒಡನೆಯೆ ದುಃಖ
ಅಬ್ಬಾ ಈ ಬದುಕೇ!!

10-10-2017. 1.01pm

Advertisements

ಮೌನದಿರುವಿನಲ್ಲಿ….

ನಾನರಸಿಕೊಂಡ ಮೌನದರಮನೆಯ ಹೊಸಿಲ ಸುತ್ತ
ಆಗಾಗ ನನ್ನದೆ ಹಸ್ತಾಕ್ಷರ ಗೀಚಿಬಿಡುವೆ
ಕುಳಿತು ಓದುವೆನು ಕಣ್ಣನಗಲಿಸಿ
ಹುಂಡಿಟ್ಟಿದ್ದು ಸರಿಯಾಗಿದೆಯೆ?
ಎಳೆದ ಗೆರಗಳ ನಡುವು ಬಳುಕಿದೆಯೆ?
ಅಂದ ಚಂದ ಓರೆ ಕೋರೆ
ಹಾಗೂ ಹೀಗೂ ನಿಂತು ಜಳಪಿಸುವ ವೈಖರಿ
ನೋಡಲದು ನನಗೊಂದೇ ಚಂದ
ಅಲ್ಲಿ ನಾನೂ ಅಂದರೆ ನಾನೊಬ್ಬಳೆ
ನಿರವ ಮೌನದ ಮಟಮಟ ಮಧ್ಯಾಹ್ನ
ನೆತ್ತಿಗೇರಿದ ಸೂರ್ಯನೂ ತಂಪಾಗಿ ಕಾಣುವಾ!

ಎಷ್ಟೊಂದು ಸೊಗಸು ಈ ಮನೆ
ಕುಳಿತು ಪಟ್ಟಂಗವಡೆಯಲು ಮನದೊಡನೆ
ಸಿಗುತ್ತೆ ಸಾಕಷ್ಟು ಪುರುಸೊತ್ತು
ಗಡಿಬಿಡಿಯಿಲ್ಲ ಗಲಿಬಿಲಿಯಿಲ್ಲ ಅಡ್ಡಿಯಾತಂಕವಿಲ್ಲವೇ ಇಲ್ಲ
ಆತ್ಮವಿಮರ್ಶೆಯಲಿ ಬಗ್ಗಿ ನನ್ನನೇ ನೋಡುವೆ
ನಡೆ ನುಡಿ ಮಾತು ಕತೆ ಬದುಕಿದ ರೀತಿ ನೀತಿ
ಕುಣಿದು ಕುಪ್ಪಳಿಸಿದ ಗಳಿಗೆ ಇತ್ಯಾದಿ.

ಕೊಂಚ ತಪ್ಪು ಮನ ಕುಟುಕಿದರೆ ಸಾಕು
ಸರಿಪಡಿಸಲಾಗದ ಬೇಗೆಗೆ
ಕೂತಲ್ಲಿ ನಿಂತಲ್ಲಿ ಅದರದೆ ಧ್ಯಾನ
ದಿಕ್ತೋಚದ ಹರಿಣಿಯಾಗಿ ಗದ್ದಕ್ಕೆ ಕೈಕೊಟ್ಟು ವ್ಯಥೆ ಪಡುತ್ತ
ಕುಳಿತ ಭಂಗಿ ನೋವುಂಡು ಸಾಕಾಗಿ ಪೆಚ್ಚು ಮೋರೆಯಿಂದೊರಬರಲು
ಮತ್ತದೆ ಜಗತ್ತಿಗೆ ಕಾಲಿಡುವೆ
ಇರಲು ನಿಮ್ಮೆಲ್ಲರ ನಡುವೆ ಶಪತ ಹೊತ್ತು
ಇದ್ದರೆ ಅಪ್ಪಟ ಬದುಕ ಬದುಕಬೇಕೆನ್ನುವ
ಒಂದೇ ಒಂದು ಸೂತ್ರ ಹಿಡಿದು.

12-10-2017 2.01pm

ಜೀವನ

ಅಣುಕಿಸುವ ಜನರ ಮಧ್ಯೆ ಬದುಕಲೇ ಬೇಕು
ಅಷ್ಟು ಅನಿವಾರ್ಯ ಈ ಬದುಕು.

ಬೆನ್ನಿಗಂಟಿದ ಹೊರೆ ಹೊರಲೇ ಬೇಕು
ಎಷ್ಟು ಮನ ನೊಂದರೂ ಬಿಡದೆ.

ಅಂಜಿಕೆಯ ಮನಕೆ ಧೈರ್ಯ ತುಂಬಲೇ ಬೇಕು
ಬೇರೆ ಗತ್ಯಂತರವಿಲ್ಲ ಅದಕೆ.

ದುಃಖತಪ್ತ ಮನ ಸಂತೈಸಿಕೊಳ್ಳಲೇ ಬೇಕು
ನಮಗೆ ನಾವೇ ಅದಕೆ.

ಒಂಟಿ ಬದುಕಿನ ಯಾನ ಅನುಭವಿಸಲೇ ಬೇಕು
ಕಾಲನ ಕೋಲು ಬೀಸುವ ತನಕ.

ಕ್ಷಣ ಕ್ಷಣ ಹತಾಷೆಗೆ ಹೃದಯವಡ್ಡಲೇ ಬೇಕು
ಕಾಲ ಕೂಡಿ ಬರುವವರೆಗೆ.

ಚಿಂತಿಸುವ ಮನ ಹೈರಾಣಾಗದಂತೆ ತಡೆಯಲೇ ಬೇಕು
ನಮ್ಮ ನಂಬಿದ ಕರುಳ ಬಳ್ಳಿಗೆ.

ಅಪವಾದ ನಿಂದನೆಗಳಿಗೆ ಕಿವುಡಾಗಲೇ ಬೇಕು
ನಮ್ಮ ನಾವು ಉಳಿಸಿಕೊಳ್ಳಲು.

ಸಹಿಸಿಕೊಳ್ಳುವ ತಾಳ್ಮೆ ಮನುಜಗೆ ಇರಲೇ ಬೇಕು
ಮನಸಲಿ ಶಾಂತಿ ನೆಲೆಗೊಳ್ಳಲು.

ನಾನು ನನದೆಂಬ ಆಸೆ ತೊರೆದು ಬದುಕಲೇ ಬೇಕು
ಆಗಾಗ ಮೌನಕೆ ಶರಣಾಗಿ.

ಬರುವ ಜಂಜಾಟಕೆ ತಲೆ ಕೊಡಲೇ ಬೇಕು
ಜೀವನವೇ ಹೀಗಲ್ಲವೆ??

12-6-2017. 8.31am

ವ್ಯತ್ಯಾಸ

ಓಡುವ ರೈಲಿಗೆ
ಸಾಗುವ ಬದುಕಿಗೆ
ಕೊನೆಯೆಂಬುದು
ರೈಲು ಕೆಟ್ಟಾಗ
ಸಾವು ಬಂದಾಗ.

ಕೆಟ್ಟರೆ
ದುರಸ್ತಿ ಮಾಡಿ ಓಡಿಸುವವರು
ಜನರು.

ಋಣತೀರಲು
ಹೊತ್ತೊಯ್ಯಲು ಬರುವವರು
ಯಮಧೂತರು.

ದುರಸ್ತಿ ಆಗದಿದ್ದರೆ
ಹಾಕುವರು ಗುಜರಿಗೆ.

ಪ್ರಾಣ ಇರದಿದ್ದರೆ
ಸಾಗಿಸುವರು ಸ್ಮಶಾನಕೆ.

11-6-2017. 5.45am