ಕವನಕ್ಕೆ ಕವನಗಳ ಜಾತ್ರೆ

image

ವಿಚಿತ್ರವಾಗಿದೆ ಆದರೂ ಸತ್ಯ ಈ ಕವನ ಬರೆಯುವ ಸನ್ನಿವೇಶ. ಹುಚ್ಚು. ಅದು. ಎಲ್ಲಿಂದ, ಯಾವಾಗ, ಹೇಗೆ, ಯಾವ ವಿಷಯ ಕುರಿತು, ಯಾವ ಗಳಿಗೆಯಲ್ಲಿ,, ಯಾಕಾಗಿ ಒಡ ಮೂಡಿ ಬರುತ್ತೊ ಗೊತ್ತಾಗದ ಒಂದು ವಿಚಿತ್ರ . ಊಹೆಗೂ ನಿಲುಕದ ಬಿಟ್ಟೋಗೆ ಅಂದರೂ ಬಿಡದ, ಬರಿಬೇಕು ಅಂದರು ಬರೆಯಲಾಗದ ಒಂದು ವಿಚಿತ್ರ. ಒಮ್ಮೊಮ್ಮೆ ಅದೆಷ್ಟು ಕಷ್ಟ, ಯಾಕಾದರು ಇದು ಅಂಟಿಕೊಂಡಿತೊ, ಓದಲು ಶುರು ಮಾಡಿದರೆ ಅದ೯ಕ್ಕೆ ನಿಲ್ಲಿಸಿ ಬರಿ ಅನ್ನುತ್ತದೆ. ಹೀಗೆ ಹಲವಾರು ಸಂದರ್ಭದಲ್ಲಿ ತಕ್ಷಣ ಬರಿಲಿಲ್ಲ ಅಂದರೆ ಪುಸಕ್ ಅಂತ ಮಾಯಾ. ನೆನಪಿಸಿಕೊಂಡರೂ ನೆನಪಾಗದ ವೈಯ್ಯಾರಿ. ಬಹುಶಃ ನನ್ನ ಹುಟ್ಟಿನೊಂದಿಗೇ ರಕ್ತಗತವಾಗಿ ಬಂದಿದೆ ಅನಿಸುತ್ತದೆ. ಇದುವರೆಗು ಅದೆಷ್ಟು ಕವನ ಬರೆದೆ; ಲೆಕ್ಕವಿಲ್ಲ.

ಅದಕ್ಕೆ ಕವನಕ್ಕೆ ಒಂದಷ್ಟು ಕವನ ಪೊಣಿಸಿದೆ. “ಮುತ್ತಿನ ಹಾರ” ಎಂದು ಹೆಸರಿಟ್ಟೆ. ಕವನದ ಕುರಿತು ಅದೆಷ್ಟು ಕವನ ಬರೆದೆ. ಕವನಗಳ ಬರೆಯುತ್ತ ಇದೊಂದು ಜೀವಂತ ವ್ಯಕ್ತಿ ಅನ್ನುವ ಭಾವನೆ ಮನದಲ್ಲಿ. ಇದು ನನ್ನ ಜೀವಂತ ಗೆಳೆಯ/ಗೆಳತಿ. ನನ್ನೊಳಗಿನ ಅದ್ಭುತ ವ್ಯಕ್ತಿ. ನನ್ನ ಮನಸ್ಸು. ನನ್ನ ಕನಸುಗಾರ. ನನ್ನೊಳಗಿನ willpower. ಬರೆದಾಗ ಅದೆಷ್ಟು ಸಂತೋಷ, ಸಮಾಧಾನ! ದಿನ ದಿನವೂ ಹೊಸ ಕವನ ಕವನಕ್ಕೆ ಬರೆಯುತಿರುವೆ. ಇದು ನಿರಂತರ.
ಜೊತೆಗೆ ನಾನೇ ಬೆಳೆದು ಕ್ಲಿಕ್ಕಿಸಿದ ಹೂಗಳೊಂದಿಗೆ!☺

25-4-2016. 6.37pm.

Advertisements

ನೆನಪಿನ ರಂಗೋಲಿ

image

ಯಾರೆ ಕೂಗಾಡಲಿ
ಊರೆ ಹೋರಾಡಲಿ
ಎಮ್ಮೇ..ನಿನಗೆ ಸಾಟಿ ಇಲ್ಲ…..
ಈ ಹಾಡು ಈ ದಿನ ಅದೆಷ್ಟು ನೆನಪಾಗುತ್ತಿದೆ. ಕನ್ನಡದ ಕಣ್ಮಣಿ ವರನಟ ಡಾ|| ರಾಜಕುಮಾರವರು ತಾವೇ ಸ್ವತಃ ಹಾಡಿ ನಟಿಸಿದ ಎಲ್ಲರ ಬಾಯಲ್ಲೂ “ಎಮ್ಮೆ ಹಾಡು” ಅದರಲ್ಲೂ ಹಳ್ಳಿ ಕಡೆ ಅತ್ಯಂತ ಪ್ರಸಿದ್ಧಿ ಪಡೆದ ಹಾಡಿದು. ಆಕಾಶವಾಣಿ ವಿವಿಧ ಭಾರತಿಯಲ್ಲಿ ಈ ಹಾಡು ಬಂದರೆ “ಜೋರಾಗಿ ಹಾಕೆ ಕೇಳ್ತಿಲ್ಲೆ” ಅನ್ನುವ ನನ್ನಜ್ಜಿ. ಆಗ ಟೀವಿ ಇಲ್ಲ, ಟೇಪರಿಕಾರ್ಡ ಇಲ್ಲ. ಎಲ್ಲದಕ್ಕೂ ರೆಡಿಯೊ.

ಆಗಿನ್ನೂ ನಾನು ಚಿಕ್ಕವಳು. ಹುಡುಗಾಟಿಗೆ ಬುದ್ದಿ. ನಮ್ಮನೆಯಲ್ಲಿ ಹಸು, ಕರು,ಎಮ್ಮೆ ಎಲ್ಲ ಸಾಕಿದ್ದರು. ಅದೊಂದು ಚಿಕ್ಕ ಹಳ್ಳಿ ಬೇರೆ. ಆಗ ಅಲ್ಲಿ ಕರೆಂಟಿಲ್ಲ. ಡಾಂಬರ ರಸ್ತೆ ಇಲ್ಲ. ಊರಿಗೆ ಬಸ್ಸು ಬರುತ್ತಿರಲಿಲ್ಲ. ಹಳ್ಳಿಯಲ್ಲಿ ಐದೇ ಐದು ಮನೆ. ಹತ್ತಿರದಲ್ಲಿ ಒಕ್ಕಲಿಗರ ಒಂದತ್ತು ಮನೆ ಇರುವ ಕೇರಿ.

ಹಳ್ಳಿಯ ಸುತ್ತ ಮುತ್ತ ಎಲ್ಲಿ ನೋಡಿದರೂ ಹಸಿರೆ ಹಸಿರು. ಸರಕಾರದವರಿಂದ ಊರಿನ ಎಮ್ಮೆ ಹಸು ಮೇಯಿದು(ಹುಲ್ಲು ತಿನ್ನಲು)ಕೊಂಡು ಬರುವುದಕ್ಕೆ ಸುಮಾರು ಎಕರೆ ಜಾಗ ಖಾಲಿ ಬಿಟ್ಟಿದ್ದರು. ಇದಕ್ಕೆ ಗೋಮಾಳ ಜಾಗ ಎಂದು ಕರೆಯುತ್ತಿದ್ದರು. ಅಲ್ಲಿ ಬಿದ್ದಿರುವ ಸಗಣಿ ಆಯ್ದು ಬುಟ್ಟಿ ತುಂಬಿ ತಂದು ಬೆರಣಿ ತಟ್ಟೋದು ಮಾರಿ ಜೀವನ ನಡೆಸೋದು ಕೆಲವು ಹೆಂಗಸರ ಕಸುಬು.

ನನ್ನ ಅಜ್ಜಿಗೊ ಹಸು ಕರು ಅಂದರೆ ಪಂಚ ಪ್ರಾಣ. ಒಂದು ಬೆಳಗ್ಗೆ ಅವುಗಳ ಚಾಕರಿ(ಕೆಲಸ)ಶುರುವಾದರೆ ಸಾಯಂಕಾಲ ಮಲಗೊವರೆಗೂ ಮುಗಿಯೋದಿಲ್ಲ. ಮಕ್ಕಳನ್ನಾದರೂ ಅಷ್ಟು ಚೆನ್ನಾಗಿ ನೋಡಿಕೊಳ್ಳುತ್ತೇವೋ ಇಲ್ಲವೊ. ಅವುಗಳ ಲಾಲನೆ ಪಾಲನೆಯಲ್ಲಿ ತಮ್ಮ ಜೀವನವನ್ನೆ ಸವೆಸಿದರವರು.

ಇಂತಿಪ್ಪ ನನ್ನಜ್ಜಿಗೆ ಕೇಳಬೇಕಾ ಈ ಎಮ್ಮೆ ಹಾಡು! ಅದೆಷ್ಟು ಇಷ್ಟ ಪಡುತ್ತಿದ್ದರೆಂದರೆ ಈ ಹಾಡು ಅವರ ಬಾಯಲ್ಲಿ ಯಕ್ಷಗಾನದ ದಾಟಿಯಲ್ಲಿ” ರಾಜಕುಮಾರ ಎಮ್ಮೆ ಮೇಲೆ ಕುಳಿತ ಬಂಗಿ, ಅರೆ ಹೊಯ್, ಅರೆ ಹೊಯ್” ತಾಳ ಹಾಕಿ ಮುಖ ಇಷ್ಟಗಲ ಮಾಡಿಕೊಂಡು ಹೇಳುತ್ತಿದ್ದರು. ಈ ಸಿನೇಮಾದ ಮುಂದೆ ಯಾವುದೂ ಇಲ್ಲ ಬಿಡು. “ನೋಡ್ದ್ಯೆನೆ ಆ ರಾಜಕುಮಾರಂಗು ಯನ್ನ ಹಂಗೆ ಎಮ್ಮೆ ಕಂಡರೆ ಎಷ್ಟು ಪ್ರೀತಿ. ಅದೆಷ್ಟು ಚಂದ ಎಮ್ಮೆ ಮೇಲೆ ಕೂತಗಂಡು ಹಾಡಿದ್ನೆ. ಯಂಗೆಂತು ಇನ್ನೂ ಒಂದೆರಡು ಸರ್ತಿ ಸಿನೇಮಾ ನೋಡವು ಕಾಣ್ತೆ. ಪಾಪ ಆ ಏಮ್ಮ್ಯರು ಅವನ ಹೊತ್ಗಂಡು ಓಡಾಡಿದ್ದಲೆ. ಅದೂ ಇಷ್ಟಗಲ ಕೋಡ ಬಿಟ್ಡಂಡು ಹ್ಯಾಂಗಿದ್ದೆ. ಲಾಯ್ಕಿದ್ದು ಎಮ್ಮೆ.”

ಇದು ಸಿನೇಮಾದಲ್ಲಿ ಅಭಿನಯಿಸಿರುವುದು ಅನ್ನುವ ಅಭಿಪ್ರಾಯ ಅಜ್ಜಿಯ ಮನದಲ್ಲಿ ಇರಲಿಲ್ಲ. ಅಬ್ಬಾ ಅವರ ಅಭಿನಯ, ಆ ಹಾಡು ಯಾವತ್ತೂ ನಿಜಕ್ಕೂ ಮರೆಯಲು ಸಾಧ್ಯ ಇಲ್ಲ. ನೋಡುಗರ ಮನದಲ್ಲಿ ನಿಜವೆಂದು ಉಳಿಯುವಂತ ಅಭಿನಯ.

ಅದು ಮಳೆಗಾಲ. ಸುಮಾರು ಹನ್ನೊಂದು ಗಂಟೆಗೆ ಎರಡು ಎಮ್ಮೆ ಹೊಡಕೊಂಡು(ಕರೆದುಕೊಂಡು) ಮೇಯಿಸಲು ಸ್ವತಃ ಹತ್ತಿರ ಅಂದರೆ ಸುತ್ತ ಮುತ್ತ ಒಂದು ಎರಡು ಕಿಲೋ ಮೀಟರ್ ಹೋಗುತ್ತಿದ್ದರು. ನನಗೂ ಹೋಗೊ ಆಸೆ. ಶಾಲೆಗೆ ರಜೆ ಬೇರೆ ಇತ್ತು. ಬೇಡ ಅಂದರೂ ಕೇಳದೆ ಕಂಬಳಿ ಕೊಪ್ಪೆ (ಮಳೆಗಾಲದಲ್ಲಿ ಬಳಸುವ ಕಂಬಳಿಯ ವಿಶಿಷ್ಟ ಮಡಿಕೆಯ ಧಿರಿಸು) ಹಾಕಿಕೊಂಡು ಕೈಯಲ್ಲಿ ಕೋಲು ಹಿಡಿದು ಹೊರಟೆ.
ಜಿಟಿ ಜಿಟಿ ಮಳೆ. ಕಾಲಲ್ಲಿ ಚಪ್ಪಲಿ ಇಲ್ಲ. ಅಜ್ಜಿಯಂತೂ ಚಪ್ಪಲಿ ಹಾಕುತ್ತಿರಲಿಲ್ಲ. ನಾನು ಹಾಗೆ ಇರಬೇಕು.”ಎಂತ ಆಗ್ತಿಲ್ಲೆ ಬಾ. ಸ್ವಲ್ಪ ನೆಲ ನೋಡ್ಕಂಡು ನಡೆಯವು. ಬರಿ ಕಾಲಲ್ಲಿ ನಡದ್ರೆ ಚಮ೯ ಗಟ್ಟಿ ಆಗ್ತು. ನೋಡು ಯನ್ನ್ ಕಾಲಿಗೆಂತಾಜೆ ” ಅವರ ಮಾತು.

ಎಮ್ಮೆ ಕೊರಳಿಗೆ ಹಗ್ಗ ಇಲ್ಲ. ಹೆಸರಿಡಿದು ಮೂಕ ಪ್ರಾಣಿಗಳನ್ನು ಮಾತನಾಡಿಸಿ ಕನ್ನಡ ವಿದ್ಯೆ ಕಲಿಸಿ ಪಳಗಿಸಿದ್ದರು. ಆಗಿನ ಕಾಲವೆ ಹಾಗಿತ್ತು. ಮನೆಯ ಎಲ್ಲ ಕೆಲಸ ತಾವೆ ಮಾಡುವ ಪರಿಪಾಠ. ಇನ್ನು ಆಸ್ತಿ ಮನೆ ಚೆನ್ನಾಗಿ ಇದ್ದವರಾದರೆ ಒಂದು ಆಳಿನ ಕುಟುಂಬಕ್ಕೆ ಬಿಡಾರ(ಮನೆ)ಅವರೆ ಕಟ್ಟಿಸಿ ವಷ೯ವೆಲ್ಲ ಅವರದೆ ಮನೆಯ ತೋಟದ ಕೆಲಸ ಮನೆ ಕೆಲಸ ಮಾಡಿಸಿಕೊಳ್ಳುತ್ತಿದ್ದರು. ಆದರೆ ನಮ್ಮ ಹವ್ಯಕರಲ್ಲಿ ಸ್ಥಿತಿ ವಂತರು ಆಸ್ತಿ ತುಂಬಾ ಇದ್ದವರು ಕಡಿಮೆ.

ಹೀಗೆ ಎಮ್ಮೆ ಮೇಯಿಸ್ತಾ ದಾರಿ ಉದ್ದಕ್ಕೂ ಹೊ…ಹೊ…ಬಾ..ಬಾ.‌..ಎಂದು ಅವುಗಳನ್ನು ಕಂಟ್ರೋಲ್ ಮಾಡುತ್ತ ಎಮ್ಮೆ ಮೇಯಿಸುವ ಅಜ್ಜಿಯ ವೈಖರಿ. ಅವುಗಳೂ ಅಷ್ಟೆ ಮೆಂದು ಮೆಂದು ಸಾಕಾಗಿ ಹುಲ್ಲಿನ ಮೇಲೆ ಸುಖಾಸೀನವಾಗಿ ತಿಂದ ಹುಲ್ಲು ಮೆಲುಕು(ಪುನಃ ಜಗಿಯುವ ವಿಚಿತ್ರ : ದೇವರ ವರ)ಹಾಕುತ್ತ ಕೆಲವು ಸಮಯ ಕಾಲ ಕಳೆಯುತ್ತವೆ. ನನಗೊ ಅಲ್ಲಿಯ ಸುಂದರ ಪರಿಸರ ಇನ್ನೂ ಕಣ್ಣಿಗೆ ಕಟ್ಟಿದಂತಿದೆ. ಆ ಪರಿಸರದಲ್ಲಿ ಸಿಗುವ ಹಣ್ಣು ದಾಸಾಳಣ್ಣು, ಸಂಪಿಗೆ ಹಣ್ಣು ,ಕೌಳೀ ಹಣ್ಣು, ಬಿಕ್ಕೆ ಹಣ್ಣು, ಗೇರಣ್ಣು, ನೇರಳೆ ಹಣ್ಣು, ನೆಲ್ಲಿ ಕಾಯಿ ಒಂದಾ ಎರಡಾ. ಹಾಗೆ ನೇರಳೆ ಮರದ ಎಲೆ ಕಿತ್ತು ಸುರಳಿ ಸುತ್ತಿ ಬಾಯಲ್ಲಿ ಇಟ್ಟು ‘ಪೀ^^^^ ಅಂತ ಸ್ವರ ಹೊರಡಿಸೋದು. ಸಖತ್ತಾಗಿತ್ತು. ಒಂಥರಾ ಮಜಾ ಫುಲ್ ಫ್ರೀಡಮ್ಮು. ಮನೆಯಲ್ಲಿ ಇದ್ದರೆ ಓದು ಬರಿ ಕೆಲಸ ಮಾಡು. ನನಗೊ ಇದ್ಯಾವುದು ಬೇಡ. ಹೀಗೆ ಎಮ್ಮೆ ಕಾಯೊ ಕಾಯಕ ಅಜ್ಜಿ ಜೊತೆಗೆ ಆಗಾಗ ನಾನೂ ಹೋಗುತ್ತಿದ್ದೆ. ಎಲ್ಲಾ ಕಡೆ ಸುತ್ತಾಡಿ ಸುಸ್ತಾಗಿ ಮನೆಗೆ ಹೊತ್ತು ಮುಳುಗುವುದರೊಳಗೆ ಬರೋದು. ಇವೆಲ್ಲ ಎಷ್ಟೋ ವಷ೯ದ ಹಿಂದಿನ ಕಥೆ!

ಆದರೆ ಈಗ ನಮ್ಮ ಹಳ್ಳಿಯ ಪರಿಸರ ಸಂಪೂರ್ಣ ಬದಲಾಗಿದೆ. ಸುತ್ತ ಮುತ್ತ ಗೋಮಾಳ ಜಾಗದಲ್ಲಿ ಅಲ್ಲಲ್ಲಿ ಬೇರೆ ಊರಿಂದ ಬಂದ ಕೆಲಸಗಾರರು ಅಥವಾ ಅಲ್ಲಿನ ಕೆಲಸಗಾರರಿಂದ ಹೀಗೆ ಹಲವಾರು ಮನೆ ಎದ್ದು ನಿಂತಿದೆ. ಸರಕಾರ ಕೂಡ ಬಡವರಿಗೆ ಮನೆ ಕಟ್ಟಿ ಕೊಟ್ಟಿದೆ. ಈಗ ಸಣ್ಣ ಹಳ್ಳಿ ಹೋಗಿ ಸಿಟಿ ಆಗಿದೆ. ಆಧುನಿಕ ಸೌಲಭ್ಯಗಳು ಸೇರಿಕೊಂಡಿವೆ. ಜಗದಗಲ ಊರಗಲವಾಗಿದೆ. ಆ ಹಸಿರು ವನ ರಾಶಿ ಇಲ್ಲವೆ ಇಲ್ಲ.
ಎಮ್ಮೆಯ ಹಾಡು ಹೇಳುವ ನನ್ನ ಅಜ್ಜಿನೂ ಇಲ್ಲ; ಈ ಹಾಡು ಹಾಡಿ, ನಟಿಸಿ ಎಲ್ಲರ ಮನೆ ಮಾತಾದ ರಾಜಣ್ಣನೂ ಇಲ್ಲ. ಈಗ ಎಲ್ಲವೂ ಬರಿ ನೆನಪಷ್ಟೆ.

ಇವತ್ತು ಡಾ||ರಾಜಕುಮಾರ ಬದುಕಿದ್ದರೆ ಎಂಬತ್ತೇಳರ ಸಂಭ್ರಮ ಆಗಿರುತ್ತಿತ್ತು. ಎಷ್ಟು ಜನ ನೂರಾರು ವರ್ಷ ಬದಕಿಲ್ಲ. ದೇವರು ಯಾಕೆ ಬೇಗ ಕರೆಸಿಕೊಂಡ ಎಂಬ ದುಃಖ ಸದಾ ಕಾಡುತ್ತದೆ‌. ಆದರೂ ನಮ್ಮೆಲ್ಲರ ಮದ್ಯೆ ಅವರು ಚಿರಾಯು. ನಮಸ್ಕಾರ ರಾಜಣ್ಣ!
HAPPY BIRTHDAY💐🎂
24-4-2016 6.02am
Published in avadhimag.com.

ನೆನಪಿನ ನೆನಪು

image

ಆಗಾಗ ನೆನಪಾಗಿ
ಏಕೆ ಕಾಡುವೆ ನನ್ನ?

ನಿನ್ನಿಂದ ನನಗೇನೂ
ಆಗಬೇಕಾಗಿಲ್ಲ
ಅನ್ನುವಂತೆ
ಹೇಳದೆ ಕೇಳದೆ
ಪರಾರಿ ಆದವನು
ನೀನಲ್ಲವೆ?

ಮತ್ತಿನ್ಯಾಕೆ ನನ್ನಲ್ಲಿ
ನಿನ್ನ ನೆನಪ
ಬಿಟ್ಟು ಹೋದೆ?

ಕಸಿದುಕೊಂಡು
ಹೋಗುವ ತಾಕತ್ತು
ಹುದುಗಿರುವ
ನನ್ನ ನೆನಪು
ಹೊಡೆದಟ್ಟುವ ತಾಕತ್ತು
ಎರಡೂ ಇಲ್ಲ.

ನೆನಪು
ಆಗಾಗ ನಿನ್ನ
ಚುಚ್ಚುವಾಗ
ದೂರಾದೆ ಹೇಗೆ?
ನಾ, ನೀ
ದೂರಾಗಿಲ್ಲ
ಅದು ನಿನ್ನ
ಹುಚ್ಚು ಭ್ರಮೆ!

ಉರ್ಕೋತಿಯಾ
ನೀನೂ ಕೂಡ.

ನೆನಪೆ ಹಾಗೆ
ಚಟ್ಟ ಏರುವ
ಕೊನೆ ತನಕ
ಗಳಿಗೆಯ ನೆನಪು
ಅಳಿಯಲಾರದು
ನಿನ್ನ ನಿದ್ದೆಯ
ನೀನೇ
ಮಾಡುವಷ್ಟೆ
ಸತ್ಯ ಸತ್ಯ ಸತ್ಯ.
23-4-2016. 4.51pm

ವಾಯು ಪುತ್ರ

image

ನೀನೆನೊ ಹನುಮ
ನೀನು ರಾಮ ಭಕ್ತ
ಎಂದುಸುರಿದ ಗಳಿಗೆ
ದೃಡಪಡಿಸಲು
ಎದೆಯನ್ನೆ ಸೀಳಿ
ಸೆಟೆದು ನಿಂತೆ
ಸೀತಾ ರಾಮರ
ದಷ೯ನ ನೀಡಿ
ಪಾವನನಾದೆ.

ಆದರೆ
ಇದು ಕಲಿಯುಗ
ಎದೆ ಏನು
ಇಡೀ ದೇಹ
ಉದ್ದಗಲ ಸೀಳಿದರೂ
ಒಂದಿನಿತು
ದೇಶ ಭಕ್ತಿಯ ಕಾಣೆ
ಭಾರತಾಂಬೆಯ
ಮಡಿಲು
ನಿನ್ನಂಥವನಿಲ್ಲದೆ
ಬರಿದಾಗಿಹುದಲ್ಲೊ!
22-4-2016. 11.12pm

ಹವ್ಯಕ ಸತ್ಕಾರ

ತಮ ಆಸ್ರೀಗೆ
ಬೇಕನ…
ತಂಪಾಗಡ್ಡಿಲ್ಯ
ಬಿಸಿ ಚಾ ಅಕ್ಕ

ಅಯ್ಯೋ ಮಾರಾಯ್ತಿ
ಅಲ್ದೆ ಅತೆ
ಹೊರಗ ಹನಿ
ಹೋಗ್ ನೋಡಿದ್ಯ?
ಬಿಸಲ್ಯಾಂಗಿದ್ದು
ಬಿಸಿ ಚಾ ಬೇಕ
ಕೇಳ್ತ್ಯಲ್ಲೆ.

ಹಂಗರೆ ನಿಂಗೆ
ಮಜ್ಜಿಗೆಗೆ
ಬೆಲ್ಲ ಕರಡಿ
ಕೊಡ್ಲನ….
ಗನಾ
ಜೋನಿ ಬೆಲ್ಲ ಇದ್ದು
ತಡಿ ಬಾವಿಂದ
ತಣ್ಣ್ಗಿನ್ ನೀರು
ಸೇದ್ಕಂಡ ಬರ್ತಿ.

ಅಯ್ಯೋ ಅತೆ
ಯಂಗ
ಪ್ಯಾಟೆಲ್ಲಿ ಹುಟ್ಟಿ ಬೆಳದವು
ಮಜ್ಜಿಗೆ ಬೆಲ್ಲ
ಯಂಗಂತೂ ಸೇರ್ತಿಲ್ಲ್ಯೆ
ನೊರೆ ನೊರೆ
ಲಸ್ಸೀ ಕುಡ್ದ
ಅಭ್ಯಾಸ ಆಗೋಜು.

ಹಂಗರೆ ತಮ
ತಣ್ಣ್ಗಿನ್ ನೀರು
ಮಂದ ಬೆಲ್ಲ
ಬಾಯಿಗಾಕ್ಕಂಡು
ಅದಾರು ಕುಡಿ ಅಕ್ಕ……
ಯಮ್ಮನೆ
ಭಾವಿ ನೀರು
ಚೊಲೋ ಇದ್ದು
ನೀ ಒಂದ ಸಲ
ಕುಡದ್ನೋಡು.

ಅಯ್ಯೋ ಅತೆ
ಭಾವಿ ನೀರು
ಯಂಗೊತ್ತಿಲ್ಲೆ
ಯಂಗ ಯಾವಾಗ್ಲೂ
ಕಾವೇರಿ ನೀರೆ
ಕುಡಿಯದು
ಅಕೊಗಾರ್ಡು
ಹಾಕ್ಕಂಜ
ಗಲೀಜು ನೀರಾದ್ರೂ
ಎಷ್ಟು ಸ್ವಚ್ಛ ಆಗಿ
ಬರ್ತು ಗೊತ್ತಿದ್ದ?
ರುಚೀ ಇರ್ತು.

ಹಂಗರೆ ತಮ
ಎಂತ ಹೇಳಲೆ ಹೇಳಿ
ಯಮ್ಮನೀಗೆ ಬಂಜೆ
ಎಂತ ಕೊಟ್ರೂ
ಬ್ಯಾಡಾ ಹೇಳ್ತೆ
ಕವಳನರೂ ಹಾಕ್ತ್ಯ
ಮನೀಗ ಬಂದವು
ಎಂತ ತಗಳ್ದೆ ಹಂಗೆ
ಹೋಪಲಿಲ್ಲೆ
ಯಂಗ್ಳ
ಹವ್ಯಕ್ರ ಸಂಪ್ರದಾಯ
ತಗ ಕವಳದ ಮರಿಗೆ
ಗನಾ ಅಂಬಾಡಿ ಎಲೆ ಇದ್ದು
ಬ್ಯಾಡಾ ಹೇಳಡ.

ಅಯ್ಯೋ ಅತೆ
ಆ ಯನ್ ಮದ್ವೀಗೆ
ಕರೆಯಲ್ಲೆ ಬಂಜಿ
ಕವಳ ಹಾಕ್ಯಂಡ್ರೆ
ಬಾಯಿ ಕೆಂಪಾಗೋಕ್ತು
ಯಂಗೆ ಇದೆಲ್ಲ
ಆಗಬತ್ತಿಲ್ಲೆ.

ಹೌದನ
ಮದ್ವೀಗೆ ಕರೆಯಲ್ಲ್ ಬಂಜ್ಯ?
ಸೀ ತಿನ್ಕಂಡೇ
ಹೋಗವು
ಶಿರಾನರೂ ಮಾಡ್ತಿದ್ದಿ
ನೀ ಬ್ಯಾಡಾ ಹೇಳ್ತೆ
ನಂಗೊತ್ತಿದ್ದು
ಸಕ್ಕರೆನರೂ
ಬಾಯಿಗಾಕ್.

ಅಕ್ಕು ಅತೆ
ಹಂಗೆ ಆಗ್ಲಿ
ಸಕ್ಕರೆ ನೀರು
ಸಾಕು ಯಂಗೆ
ನಿಂಗ ಎಲ್ಲರು
ಮದುವೀಗೆ ಬರವು
ತಪ್ಪಿಸಲಿಲ್ಲೆ
ಕಾಲಿಗೆ ಬೀಳ್ತಿ
ಆಶಿವಾ೯ದ ಮಾಡು.

ಆಗ್ಲಿ ತಮ
ಇಷ್ಟಾರೂ ಬಂದ್ಯಲ……
ರಾಶಿ ಖುಷೀ ಆತು
ಮದುವೆಯೆಲ್ಲ
ಚೊಲೋ ಆಗ್ಲಿ
ಹೇಳಿ ಹರಸ್ತಿ
ಮತೆ
ಹೆಂಡತಿ ಕರಕಂಡು
ಊಟಕ್ಕೇ ಬರವು
ಹೇಳಿದ್ನಿಲ್ಲೆ ಹೇಳಡಾ.

ತಡಿ ತಮ
ದೇವರ ಗೂಡಲ್ಲಿ
ಅಕ್ಷತೆ ಕಾಳಿದ್ದು
ತಗಂಬತ್ತಿ ಕೂತ್ಕಂಡಿರು
ಬಾ ಹಿಡಕ ಅಕ್ಷತ
ದೇವರಿಗೆ ಹಾಕಿ
ಉದ್ದಂಡ
ನಮಸ್ಕಾರ ಮಾಡು
ಅವಂಗೆ ಮಾಡ್ರೆ ಸಾಕು
ಯಂಗೆಂತಕ?
ಜೀವನ್ದಲ್ಲಿ ಎಲ್ಲದಕ್ಕೂ
ಅವನ ಆಶೀರ್ವಾದ
ಒಂದಿದ್ರೆ ಸಾಕು!
21-4-2016. 7.48pm

ಅವಧಿಯಿಂದ ಮೇಲ್

ಈ ದಿನ ಅವಧಿಯವರಿಂದ ನನ್ನ ಬರವಣಿಗೆ ಕರಿತು ಹೊಗಳಿಕೆ. ಆಹಾ! ಅದೆಷ್ಟು ಖುಷಿ.
“ನಿಮ್ಮ ಶೈಲಿ ಚೆನ್ನಾಗಿದೆ. ಹವ್ಯಕ ಭಾಷೆಯಲ್ಲಿ ಕವನ ಬರೆದರೆ ಹೆಚ್ಚಿನ ಛಾಪು ಮೂಡುತ್ತದೆ. ನಿಮ್ಮ ಫೇಸ್ ಬುಕ್ ನಂಬರ ಕಳಿಸಿ. ಒಂದಷ್ಟು ಫೋಟೊ ಕಳಿಸಿ.”

ಒಬ್ಬ ಬರಹಗಾರನಿಗೆ ಇನ್ನೇನು ಬೇಕು. ನನ್ನ ಬರಹ ಹೇಗಿದೆ, ಜನ ಓದಬಹುದಾ? ಬರೆಯಲು ಯೋಗ್ಯಳಾ? ಏನಾದರೂ ತಪ್ಪು ಬರೆದೆನಾ? ಹೀಗೆ ಹಲವಾರು ಆತಂಕ. ಏಕೆಂದರೆ ಈ ಕ್ಷೇತ್ರಕ್ಕೆ ನಾನು ಹೊಸಬಳು. ನಾನು ಬರೆದಿದ್ದು ಯಾರೂ ಪರಿಶೀಲನೆ ಮಾಡುವವರೂ ಇಲ್ಲ. ಏನೊ ಧೈರ್ಯವಾಗಿ ಹೆಜ್ಜೆ ಇಡುತ್ತಿದ್ದೇನೆ.

ಆ ದೇವರ ಆಶೀರ್ವಾದ, ಓದುಗರ ಪ್ರೋತ್ಸಾಹ, ಆ ಕಾಣದ ಕೈ ಮುನ್ನಡೆಸುತ್ತಿದೆ.

ಇದೇ ಉತ್ಸಾಹದಲ್ಲಿ “ಹವ್ಯಕ ಸತ್ಕಾರ” ಅಂತ ಕವನ ಬರೆದೆ. ಅವಧಿ accept ಮಾಡಿದೆ.
THANKS GOD
Thank you AVADHI.
21-4-2016 10.56pm

ನಾ ಗಾರ್ಮೆಂಟ ಕೂಲಿ ಮಾಡಾಕಿ…‌‌‌

ಹೊತ್ತಿಗೆ ಮುಂಚೆ
ಕಾಲ್ಚೆಂಡು ಪುಟದಾಂಗ
ಪುಟಿಬೇಕ್ರಿ
ಮನಿ ಕಸ ಮುಸುರೆ
ಹೇಗಾದ್ರೂ
ಮುಗಿದೋಗಬಿಡಬೇಕ್ರಿ
ಯಾಕಂತೀರಾ?
ನಾ ಗಾರ್ಮೆಂಟನಾಗೆ
ಕೆಲಸ ಮಾಡಾಕಿ.

ಸೈರನ್ ಗಂಟಿ
ಕಿವಿ ಹಿಂಡತಾವ್
ಒಂದೈದು ನಿಮಿಷ
ಎಂಟ್ರಿ ತಡಾತಂದ್ರ
ರಜೆ ಕಟ್ರಿ
ಇಲ್ಲಾಕಂದ್ರ
ಸಂಬಳ ಕಟ್ರಿ.

ವಷ೯ಕ್ಕೊಂದೆರಡ
ರಜಾ ಬಿಟ್ರ
ಶನಿವಾರ ಇಲ್ರಿ
ಬಾನುವಾರ ರಜೆ
ಮೊದಲೆ ಇಲ್ಲ್ ಬಿಡ್ರಿ
ಹಬ್ಬ ಹುಣ್ಣಿಮೆ
ಕೇಳಾ ಬ್ಯಾಡ್ರಿ.

ಮಕ್ಕೊಂಡ ಶಿಶು
ರಚ್ಚಿ ಹಿಡದೈತ್ರಿ
ಸೋರಾಕತ್ತಾವ್ ಎದಿ ಹಾಲ್
ಏಯ್ ಮುಚ್ಕಂಡ ಕೆಲಸ
ಮಾಡಂದಾನವನು
ಪುಕ್ಕಟ್ ಸಂಬಳ
ಕೊಡಲೇನ್ ನಿನಗ.

ಮಾತಾಡಾಂಗಿಲ್ಲರೀ
ನಾವ್ ಹೊಟ್ಟೆ ಪಾಡಿಗ್
ಸೇರ್ಕಂಡಿವ್ರೀ
ಇಲ್ಲಿ ಸಾಲಿ ಬರೆ
ಹತ್ತನೆ ಕ್ಲಾಸ್ ಸಾಕ್ರೀ
ಬಟ್ಟಿ ಹೊಲಿಯಾಕ್
ಬರಬೇಕ ನೋಡ್ರಿ.

ಪಿ.ಎಫ್ ಸೌಲತ್ ಐತ್ರಿ
ಇ.ಎಸ್.ಐ.ಸೌಲತ್ ಐತ್ರಿ
ರೊಕ್ಕ ಎಣಿಸೊ
ಮಂದಿ ಈಗ
ಹೊಸಾ ಕಾನೂನ
ತಂದಾರ್ರಿ
ಗಲಾಟೆ ಮಾಡಿ
ಬೆಂಕಿ ಹಚ್ಚಾತ್ರಿ
ಆದ್ರ
ನನ್ನೊಟ್ಟೆ ಉರಿತೈತ್ರಿ
ಒಂದಿನ ಸಂಬಳ
ಕಟ್ಟಾಯ್ತಲ್ರಿ.

ಎಂಟರ ಬೆಳಗಿ
ಹಾಜರಾಗ ಬೇಕ್ರಿ
ಓಟಿ ಆಸಿ ತೋರ್ಸಿ ನಮಗ
ಗಂಟಿ ಹತ್ತಾದ್ರೂ
ಗಂಡು ಕೂಸಾದ್ರೆ
ಬಿಡಾಂಗಿಲ್ರಿ
ನೈಟ್ ಶಿಫ್ಟು
ಮಾಡಂತಾರ್ರಿ.

ಹೆಣ್ಮಕ್ಕಳ ಗೋಳು
ಒಸಿ ತ್ರಾಸ ಐತ್ರಿ
ಕಣ್ಣಿನ ದೃಷ್ಟಿ
ಆಗಾಗ ಕಾಡತೈತ್ರಿ
ಹರೆದ ಹೆಣ್ಮಕ್ಕಳೆ
ಬಾಳ ಅದಾರ್ರಿ
ಆದ್ರ್ ಏನೂ
ಮಾಡಾಕಾಗೂದಿಲ್ರಿ.

ಒಂದಾ ಎರಡಾ
ಇಲ್ಲಿ ಗೋಳು
ಸಂಬಳದ ಅಂಕಿ
ಏರೋದಿಲ್ರಿ
ಆರ್ಡರ್ ಟಾರ್ಗೆಟ್
ಇತ್ತಂದರಿ
ನಮ್ಮ ರಟ್ಟಿ
ಹೈರಾಣಾಗಾದು
ಗ್ಯಾರಂಟ್ರಿ.

ಏನ್ಮಾಡಾದು
ನಾನು ಗಾರ್ಮೆಂಟ
ಕೂಲಿ ಮಾಡಾಕಿ.
20-4-2016. 8.23 pm
(Published in Avadhi. mag.
Thanks avadhi)