ಶೋಕೇಸು

ಅಂದದ ಗೊಂಬೆ
ಚಿಕ್ಕಂದಿನ ಅಡಿಗೆ ಆಟದ ಸಾಮಾನು
ಅಮ್ಮ ಹೆಣೆದ ಮುತ್ತಿನ ಮಂಟಪ
ಧ್ಯಾನ ಮುಕ್ತ ಬುಧ್ಧ
ಹಲವು ದೇವರ ಚೌಕಟ್ಟು
ಸಂಭ್ರಮದಿ ತಂದಿಟ್ಟ ನಮ್ಮೂರಿನ
ಶಾಲೆಯಲಿ ಗೆದ್ದ ಪ್ರಶಸ್ತಿಗಳು
ಅಜ್ಜಿಯ ನೆನಪಿಗೆ ತಂದಿಟ್ಟುಕೊಂಡ
ಹಳೆಯ ಕಾಲದ ಕುಟ್ಟಣಿ
ಒಂದಾ ಎರಡಾ!

ಮಗ ಹೊಸದಾಗಿ ಮನೆ ಕಟ್ಟಿದ
ಸಂಭ್ರಮೋ ಸಂಭ್ರಮ
ಶುಭ್ರವಾಗಿಸಿ ಇಡಲು ಹೋದೆ
ನೋಡಿದೆ ಗೋಡೆಯೆಲ್ಲ
ಖಾಲಿ ಖಾಲಿ
ಬರೀ ಬಣ್ಣದ ಗೋಡೆ
ಕೇಳಿದರೆ ಉಲಿದ
ಅಮ್ಮ ಅದೀಗಿನ ಸ್ಟೈಲ್
ಪೆಚ್ಚಾದ ಮುಖ ಹೊತ್ತು
ಎತ್ತಿಟ್ಟೆ ಎಲ್ಲ ರಟ್ಟಿನ ಡಬ್ಬದಲ್ಲಿ
ಆಗಾಗ ಬಗ್ಗಿ ಬಗ್ಗಿ ನೋಡುವೆ
ಕಣ್ಣು ಮಂಜಾಗಿಸಿ.

ಗಮ್ಮನೆ ಬೀಗುತ್ತ
ಮನೆಗೊಂದು ಶೋಭೆಯಾಗಿ
ಜಗುಲಿಯ ಗೋಡೆಯಲಿ
ಚಿತ್ತಾರದ ಮರದ ಸುತ್ತು ಕಟ್ಟು
ಗ್ಲಾಸಿನೊಳಗೆ ಥಳಥಳಿಸುತ್ತ
ಊರೆಲ್ಲ ಸುತ್ತಿ ಬಂದ
ಒಂದೊಂದು ನೆನಪು
ನಿನ್ನ ಮಡಿಲೊಳಗಡಗಿಸಿಕೊಂಡು
ಕಂಡಾಗಲೆಲ್ಲ ಬೆಚ್ಚನೆಯ ಶಾಖ ಕೊಟ್ಟಂತೆ
ನೆನಪುಗಳ ಗರಿ ಬಿಚ್ಚಿಡುತ್ತಿದ್ದೆ.

ನೀನು ಈಗಿಲ್ಲ.
ವ್ಯಥೆಯಾಗುತ್ತಿದೆ ನನಗೆ
ಥಳುಕು ಆಧುನಿಕತೆ
ನಿನ್ನ ಮೂಲೆಗೆ ತಳ್ಳಿತಲ್ಲ
ಅನಾಥ ಪ್ರಜ್ಞೆ ಕಾಡುತ್ತದೆ
ಹಳತಕ್ಕೆ ಎಂಥಾ ಕಾಲ ಬಂದಿತೈಯ್ಯ!
ಈಗ ಬೆತ್ತಲೆಗೆ ಪ್ರಾಷಸ್ತ್ಯ
ಹೊಸ ಮನೆಯ
ಗೋಡೆಯೆಲ್ಲ ಬಣಬಣ
ಆಧುನಿಕ ಹೆಣ್ಣಿನ ಹಣೆಯಂತೆ!
8-6-2016. 1.51pm.