ಈ ಚಳಿಗೆ ಆಗಾಗ ಗುಟುಕರಿಸಲು
ಚಹದ ಅಗತ್ಯ ಬಾರಿ ಜೋರು
ಅದರ ನೆನಪೇ ಸಟಕ್ಕನೆ
ಎದ್ದೇಳಲು ಕೊಡುವ ಕಿಕ್ಕು
ಒಂದೇ ನೆಗೆತಕ್ಕೆ ಅಡಿಗೆಮನೆ ಸೇರು
ಎಂದುಸುರುವುದು ಪಿಸು ಮಾತಿನಲಿ
ಈ ಮಾತೇ ಸುಪ್ರಭಾತಕ್ಕೆ ಹಾಯ್ ಹಾಯ್.
ಬೋಗುಣಿ ಬಿಸಿಯಾಗಲಿಕ್ಕಿಲ್ಲ
ಮಳಮಳನೆ ಕುದಿತದ ನೆಗೆತ ಸೈಡೆಲ್ಲ ಅಂಟಿ
ಉಕ್ಕಿಬರುವ ರಭಸಕ್ಕೆ
‘ಕೊಂಚ ಉರಿ ಕಡಿಮೆ ಮಾಡೇ’
ನೋಡಿ ಅದರ ದೌಲತ್ತು
ಗಂಡ ಹೆಂಡತಿಗೆ ಹೇಳಿದಂತೆ ಸಿಂಗ್ಯುಲರ್
ಸಲಿಗೆ ಜಾಸ್ತಿ ಆಯಿತು ಅನಿಸಲ್ವಾ?
ಇತ್ತೀಚೆಗೆ ಒಂದು ದಿನ ಹೀಗನಿಸಿ
ಕೇಳಿಯೇ ಬಿಟ್ಟೆ ಏನು ನಿನ್ನ ದೌಲತ್ತು
ಹಿರಿಯರೆಂಬ ಗೌರವವೂ ಇಲ್ಲ ನಿನಗೆ
ಅದಕೆ ಚಹಾ ಹೇಳಿತು ;
ನೀನ್ಯಾವ ಸೀಮೆ ಹಿರೀಕಳೆ
ಉಹ್ಮೂಂ…. ನಿನಗಿಂತ ನಾನು ಮೊದಲು ಬಂದಿದ್ದು
ತಿಳ್ಕ… ನನಗೆ ನೀನು ಗೌರವ ಕೊಡಬೇಕು.
ಅಯ್ಯೋ ಶಿವನೇ… ಹೌದಲ್ವಾ
ಯಾಪಾಟಿ ವರ್ಷ ಆಯಿತು ನೀನು ಧರೆಗೆ ಬಂದು
ಹೌದು…ನಿನಗೆಷ್ಟು ವರ್ಷ?
ಹುಟ್ಟಿದ ದಿನ ಹೇಳು ಹುಟ್ದಬ್ಬ ಮಾಡೋಣಾ ಅಂದೆ
ಅದ್ಕವಳು ನನ್ನ ವಯಸ್ಸು ಹೇಳಾಕಿಲ್ಲ…
ನನಗೆ ದಿನಾಲೂ ಹುಟ್ದಬ್ಬನೇ
ಯಾರೆಷ್ಟು ಕೇಕ್ ಕಟ್ ಮಾಡಲಿ
ಕೊನೆಯಲ್ಲಿ ಬೆಚ್ಚಗಿನ ಚಹಾ ಬೇಕು
ಅಂತ ನನ್ನೇ ಆಹ್ವಾನಿಸೋದು ಗೊತ್ತಾ….?
ನೋಡಿ ಅವಳ ಧಿಮಾಕಿನ ಮಾತು
ದೌಲತ್ತು ಎಷ್ಟೇ ಇರಲಿ
ರಾಜಿಯಾಗದೇ ಗತಿ ಇಲ್ಲ
ಹೂಂ….ಬಾರೆ ನಿನ್ನ ಹಿರದ ಹೊರತೂ
ಈ ಚಳಿಗೆ ಮನಸು ಕೈಕಾಲೇ ಓಡಲ್ಲ
ಅಂದಿದ್ದಕ್ಕೆ ಓಡಿಬಂದು ತಬ್ಬಿಕೊಂಡು
ಚಳಿಯೆಲ್ಲ ಓಡಿಸಿ ಮೈ ಬೆಚ್ಚಗಾಗಿಸಿತು.